Departamenti për kontroll të brendshëm, hetime kriminalistike dhe standarde profesionale pranë MPB-së ka paraqitur kallëzim penal në Prokurorinë Themelore Publike në Ohër kundër A.M., zyrtar policie pranë SPB Ohër, për shkak të ekzistimit të bazave të dyshimit se ka kryer vepër penale “prodhim dhe shpërndarje e paautorizuar e narkotikëve, substancave psikotrope dhe prekursorëve”, sipas nenit 215 paragrafi 1 të Kodit Penal.
Në periudhën kohore kur punonjësi i policisë A.M. ka qenë i paraparë për punë dhe ka kryer detyra të punës për sigurimin e vilës Bela (ish-vila Maqedonia), në pronësi të Ministrisë për Punë të Brendshme, nga ana e të punësuarve në Departamentin për kontroll të brendshëm, hetime kriminalistike dhe standarde profesionale është kryer kontroll ndaj A.M. dhe në hapësirën e punës – shtëpiza e rojes, gjatë të cilit në hapësirën e punës, mbi tavolinën e punës, është gjetur një lugë metalike me substancë të bardhë pluhuri, një pecetë letre me substancë të bardhë pluhuri dhe një shishe plastike e vogël me lëng të panjohur, me një tub të improvizuar nga një kartëmonedhë prej 10 denarësh, e mbyllur me fletë alumini në hapjen e shishes, mbi të cilën kishte mbetje të një substance të panjohur.
Nga ana e të punësuarve të Departamentit për kontroll të brendshëm, hetime kriminalistike dhe standarde profesionale, A.M. është njoftuar për nevojën për t’iu nënshtruar testimit për praninë e metabolitëve të substancave narkotike në urinë në Institutin për Mjekësi Ligjore në Shkup. Nga ana e mjekut të Ndihmës së Shpejtë Mjekësore në Ohër është konstatuar se A.M. është në gjendje të mirë të përgjithshme dhe mund të udhëtojë për në Shkup, por ai ka refuzuar të bashkëpunojë me të punësuarit e Departamentit dhe të nënshtrohet testimit.
Kundër A.M., nga ana e Departamentit për kontroll të brendshëm, hetime kriminalistike dhe standarde profesionale, është iniciuar tashmë procedurë disiplinore dhe është marrë masa e detyrueshme për largim nga vendi i punës – pezullim nga vendi i punës.
