Sot, kandidati për kryetar të Komunës së Çairit, Bujar Osmani, së bashku me arkitektin botërisht të njohur Michel Rojkind, shëtitën nëpër Çair dhe Çarshinë e Vjetër të Shkupit dhe ndanë hapat e parë të vizionit të ri për zhvillimin urban të komunës.
“E dëgjoja me kujdes Michelin teksa analizonte rrugët, hapësirën, njerëzit, ai tashmë po e krijon vizionin për Çairin,” deklaroi Osmani.
Gjatë javëve të fundit, ekipi i Osmanit ka punuar në mënyrë aktive me Rojkindin për një strategji gjithëpërfshirëse të rilindjes urbane të Çairit. Siç u paralajmërua, për herë të parë, Çairi do të ketë një plan afatgjatë dhe të qëndrueshëm për urbanizimin, të ndërtuar mbi analiza konkrete dhe përvoja ndërkombëtare.
“Në vizionin e ri, Çairi do të zhvillohet si një komunë moderne, funksionale dhe e sigurt, ku nevojat e qytetarëve do të jenë në qendër të strategjisë: qasje e lehtë, hapësira publike, estetikë e pastër dhe liri lëvizjeje,” theksoi Osmani.
Michel Rojkind, i cili ka realizuar projekte arkitektonike në Nju Jork, Meksiko Siti dhe në mbarë botën, tashmë ka identifikuar pikat kyçe për përmirësimin e Çairit duke filluar nga hapësirat publike të paorganizuara deri te infrastruktura jofunksionale që e vështirëson jetën e përditshme të banorëve.
“Çairi nuk duhet më të shihet si simbol i kaosit dhe i neglizhencës. Për mua, Çairi është shtëpia ime. Dhe si kryetar i ardhshëm komune, do të derdh çdo atom energjie për ta ngritur nga hiri,” nënvizoi Osmani.
https://www.facebook.com/share/v/1JF1xw7xTu/
