Kandidati për kryetar Komune të Çairit, Bujar Osmani, në fjalimin e tij drejtuar publikut theksoi se në komunë po ngrihet një lëvizje e re, lëvizje e rezistencës dhe dinjitetit, e cila, siç tha ai, është më e madhe se çdo fushatë zgjedhore.
“Dua ta them qartë: më 19 tetor populli i Çairit do të dalë masivisht dhe do ta mposhtë sistemin e blerjes së vullnetit të qytetarëve, askush nuk mund ta zhvlerësojë zërin e tyre nëse njerëzit dalin masivisht dhe e shprehin vullnetin e tyre. Askush! Këto nuk janë zgjedhje të zakonshme. Kjo është rezistencë dhe po nis një lëvizje për një Çair të ri”, deklaroi Osmani.
“Mendoj se ajo që po ndodh në Çair është më e madhe se një fushatë zgjedhore. Zgjedhjet në Çair janë historike. Po zgjohet një energji e rezistencës. Rezistencë ndaj mënyrës së menaxhimit. Ndaj korrupsionit. Ndaj shantazheve. Ndaj klientelizmit. Ajo që po shoh këto ditë është motivim për mua. Po na bashkohen njerëz që nuk janë të asnjë partie: mësues, aktivistë, zejtarë… të cilët vijnë vetë dhe thonë: kjo është një shans historik ta çlirojmë Çairin”, deklaroi Osmani.
Ai theksoi se në Çair tashmë po formohet një lëvizje që synon të rikthejë dinjitetin dhe rendin, me një mesazh të qartë se “Çairi nuk është pronë private e askujt, e as minierë për nxjerrjen e diamanteve”.
“Po zgjohet një lëvizje për dinjitet. Një lëvizje e rezistencës për një Çair të ri, të pastër, me shkolla moderne dhe rrugë të sigurta. Një lëvizje që do të dëshmojë se Çairi nuk është pronë private e askujt. Roli im është vetëm të jem zëri i asaj energjie, ta kanalizoj institucionalisht. Fitorja nuk është e imja, fitorja është e të gjithë qytetarëve të Çairit, të cilët do të ngrihen dhe do të thonë: mjaft”, porositi Osmani.
Osmani: Më 19 tetor, populli i Çairit do të dalë masivisht dhe do ta mposhtë sistemin e blerjes së vullnetit të qytetarëve
