Presidentja e Kosovës, Vjosa Osmani, ka reaguar pas deklaratave të homologut të saj serb, Aleksandar Vuçiq, i cili ka thënë se “të gjithë po përgatiten për luftë”.
Përmes një reagimi të Presidencës në platformën X, Osmani ka dënuar thirrjet e pamatura të Vuçiqit, duke i cilësuar si një jehonë të rrezikshme të kapitujve më të errët të historisë së kohëve të fundit.
Ajo shtoi se, pavarësisht përpjekjeve të vazhdueshme dhe të palodhura të SHBA-së dhe Bashkimit Evropian për të ndërtuar paqe të qëndrueshme në rajon, Vuçiq po tregon hapur se nuk ka zgjedhur rrugën e pajtimit dhe të stabilitetit.
“Në vend që të kthejë faqen, Vuçiqi dhe regjimi i tij po flirtojnë përsëri me të njëjtat fantazi shkatërruese që dikur shkatërruan jetë të panumërta e të pafajshme”, thuhet në reagimin e Presidencës së Kosovës.
Megjithëse, sipas Osmanit, një shfaqje e tillë është parë edhe më herët.
“Në vitet 1990, Slobodan Millosheviq zgjodhi luftën gjenocidale si instrumentin e tij të fundit të pushtetit. Ai zgjeroi dhunën çnjerëzore në Kroaci, në Bosnjë dhe Hercegovinë dhe së fundmi në Kosovë – të gjitha të dokumentuara me kujdes që bota t’i shihte. Përmes makinës së tij të propagandës, me Vuçiqin si shefin e tij të propagandës, ai ndezi urrejtje që çoi në vrasje sistematike, varre masive, shkatërrime dhe izolimin më të thellë të Serbisë. Pushteti i tij përfundoi me turp: i rrëzuar nga populli i tij, i gjykuar si kriminel lufte dhe i kujtuar si njeriu që e çoi kombin e tij në rrënim dhe si kasapi i Ballkanit”, thuhet në reagim.
Në reagimin e Presidencës, tutje thuhet se tani, presidenti serb duket se beson se mund ta ringjallë të njëjtën formulë helmuese: nxitjen e konfliktit, lojën me jetë njerëzish dhe vënien e basteve se gjakderdhja do ta ruajë sundimin e tij.
“Por historia është e qartë dhe e pamëshirshme. Millosheviqi dështoi – njëjtë do të dështojë edhe Vuçiqi”.
“Lufta nuk është një mjet lidershipi. Është streha e fundit e udhëheqësve që kanë humbur legjitimitetin, që nuk mund të frymëzojnë me vizion dhe që nuk shohin rrugë përpara përveçse përmes shkatërrimit”, thuhet në deklaratë.
Nga ana tjetër, në deklaratën presidenciale, thuhet se Kosova ka zgjedhur paqen.
“Paqen, të cilën ne do ta mbrojmë me çdo kusht”, përfundon deklarata.
Presidenti serb Alleksandar Vuçiq deklaroi më 3 tetor se “të gjithë po përgatiten për luftë” dhe se Kosova po “përpiqet të përdorë periudhën para luftës” për të bindur shumicën e vendeve evropiane dhe të NATO-s në anën e saj.
“Të gjithë po përgatiten për luftë. Dhe kur ne tashmë e dimë se do të ketë luftë, dhe do të ketë, po ju them, sepse shoh çfarë po ndodh dhe si po përgatiten të gjithë. Askush nuk po përgatitet për bisedime, ata thjesht po shikojnë se kush do të jetë në anën e kujt. Ata po hapin llogoret e tyre dhe po presin fillimin”, tha Vuçiq.
