Kandidati për komunën e Çairit nga radhët e AKI-t, Bujar Osmani, në një paraqitje publike theksoi se jeta në këtë komunë nuk duhet të jetë një përballje e përditshme me problemet e krijuara nga pushtetet e mëparshme. Ai u shpreh se Çairi dhe banorët e saj meritojnë më shumë sesa ajo që u është ofruar në dy dekadat e fundit. “Fëmijët tanë meritojnë më shumë. Secili prej nesh që jeton këtu e di se jeta në Çair është e vështirë – rrugë të bllokuara, plehra në çdo cep, ndërtime pa leje që e mbytin ajrin, shkolla që nuk janë të sigurta. Kjo nuk është fat, dhe unë nuk e pranoj këtë fat. Askush nuk duhet ta pranojë,” tha Osmani. Ai e cilësoi situatën aktuale si pasojë direkte e qeverisjes së papërgjegjshme dhe u bëri thirrje qytetarëve që të mos pajtohen më me realitetin e krijuar.
“Kjo gjendje është rezultat i njerëzve që kanë sunduar për 20 vjet dhe tani duan të sundojnë përsëri. Të gjitha problemet tona kanë emër dhe mbiemër – dhe janë pasojë e vendimeve të tyre,” shtoi ai.
Osmani theksoi se kandidatura e tij nuk është pjesë e një kalkulimi politik, por rezultat i një përgjegjësie dhe përkushtimi personal për të sjellë ndryshim.
“Unë vij para jush me një mesazh të thjeshtë dhe me një plan konkret: ka ardhur koha për ndryshim. Dhe këtë ndryshim ua premtoj personalisht, si njeri. Unë jam mjek, profesionist, njeri që ka përfaqësuar zërin e qytetarëve para botës. Kur Maqedonia kryesonte me OSBE-në, unë e mbroja shtetin dhe komunitetin tonë me dinjitet. Tani, atë kredibilitet e kthej në Çair,” u shpreh ai.
Në përmbyllje, Osmani tha se nuk synon të sundojë, por të shërbejë qytetarëve, duke prezantuar edhe hapat e parë konkretë që planifikon të ndërmarrë nëse zgjidhet kryetar komune.
