Oda Ekonomike e Maqedonisë Veri-Perëndimore organizoi Ditë të Hapur mes
bizneseve anëtare të Odës dhe përfaqësuesve të Qeverisë, ku i pranishëm ishte zv. kryeministri z. Izet Mexhiti, si dhe drejtori i Agjencisë për investime të huaja dhe promovim të eksportit, z. Refik Xhemaili.
Kjo ditë e hapur u organizua me qëllim që biznesi dhe përfaqësuesit e shtetit të diskutojnë hapur për problemet me të cilat ballafaqohen kompanitë në vendin tonë, dhënien e sugjerimeve, por edhe krijimin e masave dhe mundësive për zhvillim sa më të shpejt të bizneseve dhe ekonomisë së vendit.
Në fjalën e rastit kryetari i Odës Ekonomike të Maqedonisë Veri-Perëndimore, z. Mendi Qyra tha se vlerësojnë që një partneritet strategjik i qëndrueshëm në mes Qeverisë dhe sektorit të biznesit është jetik për zhvillimin e një ekonomie të qëndrueshme dhe konkurruese.
“Andaj është e domosdoshme që Qeveria të angazhohet në krijimin e mekanizmave që forcojnë këtë bashkëpunim, duke përfshirë konsultimet e rregullta me Odat Ekonomike dhe përfshirjen e sektorit privat në hartimin e politikave makroekonomike”, tha kryetari i OEMVP-së Mendi Qyra.
Ai shtoi se element tjetër tepër i rëndësishëm i zhvillimit ekonomik në vendin tonë është edhe rritja e investimeve.
“OEMVP tash e 10 vite bën matjen e investimeve të anëtarësisë së saj. Të dhënat tona tregojnë se vetëm investimet e TOP 100 kompanive anëtare të OEMVP, në 5 vitet e fundit, kanë kaluar vlerën e mbi 600 milion eurove. Ndërsa vetëm në vitin 2024, të njëjtat kompani, kanë realizuar investime në vlerë impresionuese prej 95.6 milion euro. E gjithë kjo flet për peshën dhe rolin që kanë prodhuesit në rritjen e bruto prodhimit vendor (BPV), duke shtuar vlerë në ekonominë kombëtare”, deklaroi kryetari z. Mendi Qyra, i cili ndër të tjera theksoi se përmes mbështetjes së prodhuesve, mund të ulet deficiti tregtar duke
zëvendësuar produktet e importuara me produkte vendore dhe gjithashtu të rriten eksportet. Ai po ashtu nënvizoi edhe faktin se Ligji për mbështetje financiare të investimeve, ka ndikim të madh në fuqizimin e kompanive, ndërsa OEMVP është ura lidhëse mes kompanive dhe granteve të ndryshme qeveritare dhe ndërkombëtare.
Ndërsa zv/kryeministri i parë, z. Izet Mexhiti, deklaroi se Qeveria është vazhdimisht në komunikim me OEMVP-në dhe me sektorin e biznesit. Ai potencoi se kanë marrë një sërë masash për të krijuar ambient të favorshëm për zhvillimin e biznesit dhe tërheqjen e investimeve.
“Ne jemi të kyçur drejtpërdrejtë në financimin e bizneseve, sidomos zgjerimit të kapaciteteve aktuale të tyre me 250 milion euro nga linja kreditore që kemi marrë nga Hungaria, që ka kushte më të mira në rajon, ndërsa aplikimi është i mundshëm për secilin subjekt, pa kurrfarë diskriminimi”, deklaroi zv/kryeministri z. Izet Mexhiti.
Ai shtoi se fillimi i punimeve të ndërtimit të Korridorit 8 është mundësi e mirë për të gjitha bizneset e rajonit të Pollogut dhe më gjerë, politika fiskale është përmirësuar për të ofruar stimuj për bizneset.
Drejtori i Agjencisë për investime të huaja dhe promovim të eksportit, z. Refik Xhemaili, prezantoi të dhënat më të fundit të kompanive që aplikojnë për grante për investime.
Para anëtarëve të OEMVP-së dhe bizneseve të tjera, drejtori z. Xhemaili bëri edhe një prezantim, me qëllim informimin e bizneseve me mundësitë dhe kushtet për të aplikuar për fonde dhe për të zhvilluar edhe më tepër bizneset e tyre.
Anëtarët e OEMVP përmes diskutimit të hapur patën mundësi të parashtrojnë pyetje rreth masave të prezantuara, paqartësive të tyre rreth ligjit dhe mundësive për aplikim si dhe gjitha çështjet tjera në interes të biznesit.
Kjo ngjarje e organizuar nga OEMVP është një nga aktivitetet e dhënies së mundësisë për të shprehur qëndrimet dhe për të diskutuar drejtpërdrejt me Qeverinë dhe përfaqësuesit e saj, ndërsa përveç informacioneve për qasje në financa, Oda tani me kapacitete të shtuara asiston kompanitë në marrjen apo fitimin e të njëjtave.
