Presidenti amerikan Donald Trump shkaktoi polemika të reja të martën, pasi deklaroi se nuk dëshiron emigrantë somalezë në SHBA, duke u thënë gazetarëve se ata duhet të “kthehen nga kanë ardhur” dhe se “vendi i tyre është i keq për një arsye”.
Deklaratat u bënë gjatë një mbledhjeje të transmetuar të kabinetit, ku presidenti i quajti emigrantët “plehra” që, sipas tij, mund ta çojnë vendin “në drejtimin e gabuar”.
Komentet vijnë ndërsa mediat amerikane raportojnë për një operacion të planifikuar të imigracionit në komunitetin e madh somalez të Minnesota-s, i cili është më i madhi në SHBA dhe ndër më të mëdhenjtë në botë, shkruan BBC.
Autoritetet lokale paralajmërojnë se një operacion i tillë mund të prekë edhe qytetarë amerikanë që duken si emigrantë të Afrikës Lindore. Minneapolis dhe St. Paul – të njohura si “Twin Cities” – janë shtëpia e rreth 80 mijë personave me origjinë nga Somalia, shumica prej të cilëve janë shtetas amerikanë.
Sipas një burimi për CBS News, qindra persona pritet të jenë objektivi i operacionit të ICE këtë javë. Departamenti i Sigurisë Kombëtare nuk komentoi detaje, por tha se askush nuk synohet për shkak të racës, por vetëm për statusin e paligjshëm.
Gjatë fjalës së tij, Trump i referohej Somalisë si një vend “që mezi funksionon, pa strukturë”, duke thënë se njerëzit “thjesht vrasin njëri-tjetrin”. Më pas ai sulmoi edhe kongresisten Ilhan Omar, somalezo-amerikane dhe përfaqësuese e Minnesotës, duke e quajtur “inkompetente” dhe se “i urren të gjithë”.
Omar reagoi menjëherë në rrjetet sociale: “Fiksimi i tij me mua është i frikshëm. Shpresoj të marrë ndihmën që i duhet.”
Administrata Trump ka ashpërsuar kontrollet e imigracionit pas një incidenti të rëndë në Uashington, ku dy pjesëtarë të Gardës Kombëtare u qëlluan – njëra prej tyre humbi jetën. Autori i dyshuar është me origjinë nga Afganistani.
Presidenti ka paralajmëruar gjithashtu se do të përfundojë statusin e mbrojtur të përkohshëm (TPS) për emigrantët somalezë në Minnesota, një vendim që do të prekte disa qindra persona. Ndërkohë, Sekretarja e Sigurisë Kombëtare, Kristi Noem, paralajmëroi masa shtesë kundër mashtrimeve me viza në këtë shtet.
Zyrtarët e shtetit e kanë dënuar planin e raportuar:
Senatorja Zaynab Mohamed tha se “pothuajse të gjithë jemi qytetarë amerikanë”, duke theksuar se operacionet e tilla rrezikojnë të godasin njerëz të pafajshëm.
Guvernatori demokrat Tim Walz akuzoi administratën se po bën “një shfaqje propagandistike”, duke shtuar: “Targetimi i paarsyeshëm i emigrantëve nuk është zgjidhje reale.”
Operacioni i ICE pritet të nisë brenda ditëve, ndërsa deklaratat e Trump kanë rritur tensionet në një nga komunitetet më të larmishme dhe më të mëdha të emigrantëve në SHBA.
