Menaxheri rajonal Millosh Pejiq së bashku me Aleksandar Simoviq janë personat përgjegjës për bumin e lojërave të fatit në Maqedoni dhe rajon. Lojtarët më të mëdhenj të huaj në sektorin maqedonas të kazinove, kompanitë austriake Novomatic dhe Casinos Austria, thonë se po ndihmojnë në përmirësimin e tregut vendas. Prandaj, ata shpesh sulmojnë idetë e qeverisë për rishikimin e ligjeve të lojërave të fatit, duke i quajtur të padrejta, të parealizueshme dhe demagogjike.
Edhe pse shumë qeveri dhe koalicione deri më tani janë përpjekur të vënë rregull në këtë biznes, duket se akuzat për korrupsion janë ende të pranishme. Koalicioni qeverisës VLEN akuzoi për korrupsion politik me prokurimin e terminaleve të Videolotarisë nga Videolotaria e re shtetërore NOVO VLT gjatë periudhës zgjedhore. Ndërkaq, kompania thotë se tenderi është bërë sipas ligjit dhe se akuzat e përditshme partiake po i shkaktojnë dëme të rënda korporatave.
Pronar dominues i kësaj kompanie është Lotaria Shtetërore, ndërsa bashkëpronar është HTL Maqedoni, kompani në pronësi të plotë të austriakes Novomatic.
Sipas VLEN-it, prokuroria duhet të hetojë kontratën për blerjen e aparateve të lotarisë, pra të terminaleve të videolotarisë, të lidhur më 13 qershor, një muaj pas përfundimit të zgjedhjeve dhe para formimit të qeverisë së re.
Tenderin prej gati 19 milionë eurosh e ka fituar HTL Maqedoni, e cila është një nga pronarët e NOVO VLT. Kjo kompani ishte e vetmja ofertuese në tender. Kjo do të thotë se NOVO VLT ia dha tenderin prej 19 milionë eurosh bashkëpronarit të saj – partnerit të huaj të lotarisë shtetërore.
Nga prokuroria thanë për TV21 se janë duke punuar në disa raste që kanë të bëjnë me lotarinë.
“Në prokuroritë publike janë formuar disa lëndë në lidhje me aspekte të ndryshme të funksionimit të Lotarisë Shtetërore në bazë të njoftimeve dhe raporteve të dorëzuara nga institucionet kompetente. Kushdo që ka dijeni ose prova për vepër penale të kryer, ka detyrimin t’ia raportojë këto njohuri autoriteteve kompetente”, thonë nga Prokuroria Publike.
Kompania austriake Novomatic, përmes kompanisë së saj maqedonase HTL Maqedoni, zotëron MA Gaming dhe Masterbet, të cilat mbajnë licencat për kazinotë Astra dhe Admiral.
Përmes kompanisë maqedonase Makoten, austriakja Novomatic zotëron licencat për kazinotë në Hotel Marriott në Shkup dhe në Hotel Flamingo në Gjevgjeli.
Gjigandi i lojërave të fatit Novomatic, i udhëhequr nga themeluesi i tij miliarder dhe me qendër në Gumpoldskirchen, një qytet në perëndim të Vjenës, i famshëm për vreshtat e tij. Novomatic prodhon teknologji të lojërave të fatit, të tilla si automatet më të reja, dhe punon me kazino në një numër vendesh. Është e rrjetëzuar mirë në Vjenë dhe Bruksel. Ish-drejtori gjeneral i Novomatic, Johannes Hahn, u ngjit përmes Partisë Popullore të qendrës së djathtë në nivelet më të larta të BE-së, duke u bërë komisionari i zgjerimit i BE-së që mbikëqyr politikën e Brukselit ndaj vendeve që aspirojnë anëtarësim.
Në Austri, firma u vu nën thjerrë pas aferës “Ibiza”, skandali që rrëzoi qeverinë e Sebastian Kurz në 2019-tën. Gjatë bisedës së regjistruar fshehurazi, zëvendëskancelarja e Kurz dëgjohet duke thënë: “Novomatic po i paguan të gjithë”. Zëvendëskancelari në atë kohë ishte objekt i një operacioni politik dhe më vonë do të tërhiqte fjalët, duke thënë ishte në gjendje të alkoolizuar. Novomatic, mes të tjerash të përmendura në regjistrim, mohoi çfarëdolloj keqpërdorimi.
