Kryeministri i Australisë, Anthony Albanese, është martuar me partneren e tij, Jodie Haydon, në një dasmë pranverore në rezidencën e tij zyrtare, The Lodge.
Dasma pritej gjerësisht të mbahej këtë vit, pasi Albanese i propozoi Haydon-it ditën e Shën Valentinit vitin e kaluar, shkruan News.com.au
Albanese ka bërë histori si kryeministri i parë australian që martohet ndërsa është në detyrë.
Albanese ka pranuar me krenari rrënjët e tij arbëreshe nga Barletta, Pulia, përpara ambasadorit shqiptar në Canberra dhe komunitetit shqiptaro-australian.
Qyteza Barleta shtrihet në jug të Italisë, në rajonin e Pulias. Në Pulia jeton një komunitet i madh i arbëreshëve. Besohet se atje jetojnë rreth 100.000 arbëreshë dhe nga ky komunitet e ka prejardhjen edhe babai i kryeministrit australian.
Kush është Anthony Albanese, historia e jetës si nëpër filma, takimi me të atin pas 40 vjetësh rrëfyer nga gazetari Ruben Avxhiu.
Anthony Albanese është djali i një marinari arbëresh, Carlo Albanese nga jugu e Italisë, por me nënë australiane (me origjinë irlandeze).
Prindërit u njohën gjatë një udhëtimi nëpër Europë të Maryanne Ellery. Ai punonte në tragetin me të cilën po udhëtonte vajza australiane. Ishte dashuri me shikim të parë. Shumë shpejt u martuan dhe për tetë muaj me radhë kishin jetuar së bashku. Pastaj ai kishte vdekur në një aksident dhe nëna e tij ishte kthyer për të jetuar në Australi.
