Nesër Kuvendi do të zgjedh Qeverinë Teknike me mandatar Talat Xhaferin. Mandati i saj do jetë 100 ditë, ndërsa detyra e këtij formati të organit ekzekutiv është përgatitja e vendit për zgjedhjet parlamentare të 8 majit. Roli dhe kompetencat e kryeministrit teknik i cili buroi si ide e negociatave të “Përzhinës” në vitin 2015 është i kufizuar, përkatësisht është i cunguar nga fuqia ekzekutive. Ligji mbi Qeverinë përcakton kompetencat e organit ekzekutiv dhe të resorëve brenda saj, kryesisht të atyre që udhëhiqen nga opozita apo kanë zëvendësministra plotësues.
“Të gjitha aktet e kompetencave udhëheqëse duhet të nënshkruhen nga zëvendësi plotësues, përkatësisht zyrtari udhëheqës-plotësues. Derisa akti nënshkruhet vetëm nga një person, konsiderohet se i njëjti nuk ka fuqi juridike dhe nuk mund të ekzekutohet”, thuhet në Ligji për Qeverinë, Neni 44.
“Secili akt i bazuar në këtë ligj i dorëzohet ministrit dhe zëvendësministrit plotësues. Ministri dhe zëvendësministri plotësues janë të obliguar që menjëherë dhe në afat më së voni prej një dite të miratojnë ose hedhin poshtë aktin e bazuar në ketë ligj”, thuhet në Ligji për Qeverinë, Neni 46.
Talat Xhaferi në cilësinë e mandatarit i ka dorëzuar në Kuvend emrat e kabinetit me të cilin do të udhëheq. Ndryshime nuk ka përveç se në resorët ku parashikohen me dispozitat e Qeverisë teknike, ndërsa zëvendëskryeministri i parë do t’i takon LSDM-së dhe në këtë pozitë në vend të Artan Grubit është paraparë Bojan Mariçiq i cili njëkohësisht do të jetë ministër po resorë i angazhuar për Çështjet Evropiane.
Në vitin 2020 BDI kishte nisur fushatë e quajtur “Koha për kryeministrin e parë shqiptar”. Aso kohe, kandidat për mandatar që do të formonte Qeverinë ishte caktuar Naser Ziberi. Megjithëse zgjedhjet e 15 korrikut shuan ëndrrën e integristëve, ndërsa kreu i kësaj partia dhe ish kryeministri aso kohe Zoran Zaev ishin marrë vesh që kryeministri shqiptar të mos jetë me mandat politik por vetëm teknik edhe atë në 100 ditët e fundit të Qeverisë edhe pse socialdemokratët kishin hedhur idenë e abrogimit të kësaj Qeverie. Ziberi së fundi në një deklaratë për mediat vendase ka deklaruar se që pas formimit të Qeverisë në vitin 2020 i kishte rekomanduar Ahmetit që të pranon propozimin e VMRO-së për abrogimin e Qeverisë teknike dhe në 100 ditët e fundit të Qeverisë kryeministri të jetë me kompetenca politike, pasi sipas tij i tillë si teknik është i hendikepuar nga fuqia ekzektuvie.
Por, pavarësisht kësaj, BDI-ja në të gjitha paraqitjet në opinion, caktimin e Talat Xhaferit për kandidat për kryeministër të Qeverisë teknike, e ka vlerësuar si një nga “arritjet më të mëdha”. Qeveria që do të votohet të dielën do të jetë e tretë dhe me gjasë e fundit e karakterit të tillë. E para u zgjodh në vitin 2015 nën udhëheqjen e Emil Dimitriev ndërsa e dyta në vitin 2020 nën udhëheqjen e Oliver Spasovskit, por mandati i saj u zgjat për arsye të rrethanave me pandeminë e Kovid-19./Alsat.mk
