Qytetarët sërish kanë paralajmëruar se do të bojkotojnë supermarketet edhe gjatë kësaj të premte, por kësaj radhe me mundësi vazhdimi deri të hënën. Ndërkohë Ministria e Ekonomisë më së voni deri të hënën do të shpallë masa për çmimet e produkteve ushqimore bazë, arsye kjo e cila ka qenë edhe shkaku kryesor që qytetarët organizojnë bojkot ndaj tregjeve më të mëdha.
“Shumë shpejt do të ketë një brifing me gazetarët, ku do të njoftoheni për masat të cilat do t’i ndërmarrim. Është legjitime dhe e drejtë e qytetarëve, që të ketë bojkot. I kuptojmë dhe normalisht e përkrahim këtë iniciativë. Tregtarët, kuptohet jo të gjithë, kanë bërë rritjen e çmimeve, kështu duke e dëmtuar buxhetin e qytetarëve, duke i rritur çmimet pa ndonjë arsye apo logjikë apo edhe bazë ekonomike.”, – deklaroi ministri i Ekonomisë, Besar Durmishi.
