Se ka telashe në koalicion VLEN, tashmë nuk është fshehtësi.
Pas zhvillimeve në dy javët e fundit, sipas burimeve mirë të informuara të TV21, nga VLEN duhet larguar ASH-në. Konkretisht në udhëheqësinë e LD-së, Lëvizjes Besa dhe të Alternativës, vlerësohet se Taravari dhe ASH-ja s’kanë më vend në koalicion.
Sipas burimeve tona, ka propozime që VLEN të sjellë vendim që ASH të largohet nga VLEN dhe t’i propozohet kryeministrit edhe ta largojë nga qeveria ASH-në. E gjithë kjo, pritet të konfirmohet në 10 ditë te ardhshme.
Ndryshe, për nesër ASH-Taravari ka caktuar mbledhje të Kuvendit të partisë.
Me fillim nga ora 13, në Gostivar pritet të fillojë me punë Kuvendi, por siç u bë e ditur, me dyer të mbyllura për publikun. Kujtojmë se së fundmi, ASH-Taravari, kanë mos-pajtueshmëri rreth paraqitjes së këtij formati të koalicionit në zgjedhjet lokale. Gjegjësisht, për dallim prej partive të tjera në VLEN, ASH vlerëson se në zgjedhje, të 4 partitë duhet të dalin me lista të veçanta për këshilltarë komunalë.
Të hënën, 7 prill, me Arben Taravarin si mysafir në “Click Plus” në TV21 pritet të mësohen detajet rreth vendimeve që pritet të marrë ASH-ja.
Të enjten 3 prill, presidenti i Shqipërisë Bajram Begaj, rrugës për në Sofje/Bullgari, ku shkoi për forumin “The Aqaba Process Balkans Forum III”, takoi në Shkup kreun e Lëvizjes Demokratike, Izet Mexhiti, kreun e Kuvendit Afrim Gashi dhe zëvendëskryeministrin Arben Fetai (ASH).
Sot 4 prill, gjatë kthimit në Shqipëri, presidenti Begaj prapë u ndal në Shkup, ku takoi kreun e BDI-së Ali Ahmeti dhe kryetarin e Aleancës për Shqiptarët, Arben Taravari. Kujtojmë se pas mos-marrëveshjeve brenda VLEN, më 28 mars, liderët e partive në këtë koalicion ishin për iftar te kryeministri i Kosovës, Albin Kurti. Sipas burimeve tona, në takim liderët e partive kanë kërkuar nga Taravari llogari se pse dhe për çka është takuar me Ali Ahmetin.
Përndryshe, burime të TV21 në BDI, konfirmojnë që ka bisedime me Taravarin, për shumë tema, mes tjerash edhe për zgjedhjet lokale, për të cilat Taravari ka theksuar se ka interesin për komunat e Gostivarit, Bogovinës, Vrapçishtit, Sarajit, por edhe të Strugës. Burimet konfirmojnë se me Taravarin është biseduar edhe për “vijat e kuqe” rreth gjuhës shqipe. Pavarësisht bisedimeve, burime brenda BDI-së thonë se nuk ka marrëveshje konkrete, pasi siç shtojnë “Me Taravarin asnjëherë nuk dihet deri në fund”.
Nga ana tjetër, në opinion ka zëra që edhe VLEN po tenton që të gjejë kanalet e komunikimit me ASH-në e Ziadin Selës. Nuk dihet nëse ka bisedime më serioze mes strukturave të VLEN dhe partisë së Selës. Gjate javës në vijim, priten më tepër zhvillime në këtë drejtim.
