Në Universitetin e Tetovës, përkatësisht në Fakultetin Pedagogjik, studiuesi i njohur Steinar Bryn, mbajti ligjëratë me temë “Nga dallimet drejt bashkëpunimit: fuqia e dialogut ndërkulturor”.
Në fjalën e tij përshëndetëse, dekani i Fakultetit Pedagogjik Lulzim Mehmedi, i uroi mirëseardhje, z Steinar Bryn – studiues i njohur, promovues i paqes dhe personalitet i shquar ndërkombëtar, i nominuar shtatë herë për Çmimin Nobel për Paqe.
Dekani, theksoi se ligjërata e Dr. Bryn përfaqëson një vlerë të shtuar për Universitetin e Tetovës, duke nënvizuar rëndësinë e dialogut ndërkulturor si element thelbësor në arsim, në ndërtimin e paqes dhe forcimin e bashkëjetesës shoqërore. Ai vuri në pah se arsimi, përveç transmetimit të dijes, ka për mision edhe kultivimin e vlerave universale si respekti, empatia, mirëkuptimi dhe bashkëpunimi.
Njëkohësisht, ai shprehu mirënjohje institucionale për Qendrën për Arsim dhe Zhvillim (CED), për bashkëpunimin e vazhdueshëm dhe për kontributin e dhënë në realizimin e kësaj ligjërate në Universitetin e Tetovës. Auditorin në këtë ngjarje e përshëndeti edhe drejtori i Qendrës për Arsim dhe Zhvillim (CED) z.Metin Muaremi.
Ligjërata u ndoq me interes nga studentët, stafi akademik dhe të ftuarit e tjerë, ndërsa diskutimi i hapur që pasoi, krijoi hapësirë për reflektim akademik dhe shkëmbim idesh mbi sfidat dhe perspektivat e dialogut ndërkulturor në kontekstin arsimor dhe shoqëror bashkëkohor.
Universiteti i Tetovës mbetet i përkushtuar në organizimin e aktiviteteve akademike dhe shkencore që kontribuojnë në avancimin e dijes, promovimin e vlerave demokratike dhe forcimin e bashkëpunimit ndërkulturor.
Në Universitetin e Tetovës u mbajt ligjëratë për dialogun ndërkulturor
