Ministrja e Arsimit Vesna Janevska, ka paralajmëruar ndryshime rrënjësore në Ligjin për Arsimin e Lartë, të cilat synojnë rritjen e cilësisë akademike dhe depolitizimin e universiteteve. Sipas ministres, fokusi kryesor do të jetë te kriteret e zgjedhjes në thirrjet akademike dhe optimizimi i numrit të madh të fakulteteve në vend. Ministrja Janevska ka bërë të qartë se nuk do të ketë më avancime akademike pa punë kërkimore të mirëfilltë. Me ligjin e ri, profesorët do të jenë të obliguar të publikojnë punime në revista me faktor impakti për të marrë thirrje shkencore.
“Këto kritere po forcohen në krahasim me ligjin e kaluar, ku pothuajse nuk ekzistonin ose ishin shumë të pakta. Tani, për zgjedhjen si docent, profesor i asociuar apo profesor i rregullt, kërkojmë të kenë një veprimtari shkencore më të theksuar, përkatësisht të kenë punime shkencore të publikuara në revista me faktor impakti. Sigurisht, kjo do të reflektohet edhe te kuadri i bashkëpunëtorëve, po prezantojmë pozicionet asistent i ri dhe asistent, të cilët gjithashtu do të duhet të plotësojnë disa kushte. Një tjetër risi është se ky ligj do t’i mundësojë personit që nuk është i interesuar të avancojë, të mund të qëndrojë në të njëjtën thirrje për një kohë më të gjatë ose përjetësisht, me kusht që të plotësojë kriteret për rizgjedhje në atë thirrje”, tha Vesna Janevska, ministre e Arsimit dhe Shkencës.
Nga ana tjetër, Rektori i Universitetit të Tetovës, Jusuf Zejneli, ndonëse ka dhënë mbështetje parimore për ligjin, ka kërkuar që dokumenti final të mbrojë autonominë universitare dhe të mundësojë rritjen e kuadrit të ri. Zejneli bëri thirrje që shteti të hapë rrugë për angazhimin e të rinjve të përgatitur si asistentë, duke zëvendësuar stafin që pensionohet për të ruajtur kontinuitetin e punës në fakultete.
“Ne duhet t’u japim mundësi të rinjve kryesisht që ata të jenë të angazhuar si asistentë nëpër programe të ndryshme, fakultete të ndryshme dhe në tërësi çështja e vendeve të reja të punës dhe atyre të cilët dalin në pension që të kemi mundësi t’i zëvendësojmë me vende të reja me qëllim që të ruhet kontinuiteti. Në parim e mbështesim miratimin e ligjit por duke ruajtur autonominë universitare dhe njëkohësisht duke paraparë gjithë ato pika të cilat janë kyçe sikurse për universitetin e Tetovës dhe universitetet e tjera”, u shpreh Jusuf Zejneli, rektor I Universitetit të Tetovës.
Një pikë tjetër e nxehtë e reformës mbetet edhe numri i madh i fakulteteve në vend. Ministrja Janevska paralajmëroi se institucionet që nuk plotësojnë standardet ligjore nuk do të mund të punojnë më. Janevska tha se u ka lënë hapësire rektorëve të merren vesh për optimizmin e fakulteteve juridike, ekonomike, pedagogjike ose të tjera, të cilat sipas saj janë në numër shumë të madh.
Sipas Janevskës, ky proces synon të zvogëlojë ndikimin e partive politike në universitete dhe të krijojë një bashkësi akademike unike, ku titujt e fituar në një universitet do të njihen automatikisht në të gjithë sistemin arsimor. Ndryshimet në ligji për arsim të lartë deri në fund të kësaj jave do të publikohet në sistemin ENER, duke u hapur rrugë konsultimeve publike dhe komenteve nga palët e interesuara./ Alsat.mk
