Analisti dhe publicisti i njohur nga Shkupi, Agim Jonuz, ka ndërruar jetë pas një sëmundjeje të shkurtër. Lajmi për vdekjen e tij ka tronditur opinionin publik në Maqedoninë e Veriut, ku ai ishte një ndër zërat më të spikatur dhe më të respektuar në jetën publike, përcjell TV21.
Agim Jonuz njihej për analizat e thelluara politike, përfshirjen aktive në debatet publike dhe qëndrimet e tij të drejtpërdrejta ndaj zhvillimeve në vend dhe rajon. Si figurë publike, ai shpesh trajtonte tema që lidhen me marrëdhëniet ndëretnike dhe proceset euro-integruese të Maqedonisë së Veriut.
Në daljet e tij mediatike, Jonuz shquhej për guximin dhe sinqeritetin me të cilin kritikonte politikat përjashtuese dhe i bënte thirrje shoqërisë për bashkëjetesë, respekt të ndërsjellë dhe ndërtimin e një shteti të barabartë për të gjithë qytetarët.
I lindur dhe rritur në Shkup, Jonuz e zhvilloi aty edhe pjesën më të madhe të karrierës profesionale. Ai ka shërbyer për vite me radhë në institucione shtetërore dhe në sektorin privat, ndërsa ka mbajtur edhe postin e zëdhënësit të Qeverisë së Maqedonisë së Veriut në periudha të ndryshme. Gjatë kësaj kohe, ai u vlerësua për profesionalizëm, komunikim të qartë dhe ndershmëri në raport me opinionin publik.
Në botën e biznesit, ai ishte drejtor ekzekutiv i kompanisë “VIA Group Defence”, me veprimtari në Shkup, Ankara dhe Lindjen të Mesme. Përveç kësaj, ai ishte edhe këshilltar dhe konsulent në fusha të ndryshme ekonomike dhe të sigurisë.
