Për shkak të reshjeve të borës, sot në mëngjes nga ora 5:40 është vendosur ndalim trafiku për automjete të rënda mallrash në rrugën Gostivar – Kërçovë, nëpërmjet qafës malore Strazhë, njofton Ndërmarrja Publike “Rrugët e Maqedonisë”, transmeton Portalb.mk.
Gjithashtu, për shkak të reshjeve të borës, është vendosur ndalim trafiku për kamionë dhe autobusë në rrugën Mavrovë – Dibër.
Në rrugën Tetovë – Kodër e Diellit nga ora 5:55 e mëngjesit të sotëm, për shkak të reshjeve të borës, është vendosur ndalim trafiku për autobusë, ndërsa përdorimi i pajisjeve dimërore është i detyrueshëm për llojet e tjera të automjeteve.
“Rrugët e Maqedonisë” thotë se trafiku në rrugët shtetërore po zhvillohet në rrugë kryesisht me lagështi. Në vendet më të larta në pjesët perëndimore të vendit, ka mbetje të llucës, pas ndërhyrjes së ekipeve të kujdestarisë. Borë me intensitet të ndryshueshëm po bie në Kodër të Diellit, Mavrovë dhe Strazhë, ndërsa në qafën malore Bukovë reshjet janë përzierje shiu dhe bore.
Të gjitha rrugët në vend, shton ndërrmarrja, janë të kalueshme, dhe në pjesë të caktuara që kalojnë nëpër prerje dhe gryka, janë të mundshme rrëshqitje të vogla toke.
NP “Rrugët e Maqedonisë” bën thirrje për drejtim të kujdesshëm të automjeteve, respektim të sinjalistikës së trafikut dhe përshtatje të shpejtësisë me kushtet e rrugës.
