Ministri i Çështjeve Evropiane, Orhan Murtezani, në intervistë për Kanal5 tha se Arben Taravarit i kanë ofruar një listë bllanko të shkruaj se sa komuna dëshiron. Ai shton se arsyeja e dorëheqjes së Taravarit është pikërisht dëshira e tij për të bashkëpunuar me BDI-në.
“Ne i kemi mundësuar Taravarit që të nënshkruaj bllanko sa komuna dëshiron por nuk ka pranuar. Shqiptarët na kanë dhënë mbështetje të jashtëzakonshme që ka qenë si burim i shpresës. BDI të shkojë në opozitë dhe të krijohet hapësirë për mirë qeverisje. Dërgimin formal të BDI-së në opozitë planifikojmë ta bëjmë në zgjedhjet lokale dhe ta dëshmojmë qeverisjen ndryshe. Taravari u dorëzua në mes të rrugëtimit, por ne do të vazhdojmë”, tha ministri Orhan Murtezani.
Ai shtoi se Taravari nuk doli nga qeveria për çështje parimesh por përshkak të dëshirës së tij për të bashkëpunuar me BDI-në.
“Taravari muaj më parë deklaronte se me Mickoskin nuk ka fare problem gjithçka është në rregull me të, problemin e identifikonte në VLEN. Dalja e tij nga qeveria nuk ka qenë për çështje parimesh dhe për asnjë problematikë tjetër. Arsyeja kryesore ka qenë bashkëpunimi i tij me BDI-në për zgjedhjet lokale”, përfundoi ministri Murtezani.
