Ministri për Çështje Evropiane, z. Orhan Murtezani, në kuadër të ditës së parë të vizitës punuese në Bruksel, zhvilloi takime të ndara me drejtoreshën e përgjithshme të Drejtoratit të përgjithshëm për politikë rajonale dhe urbane të Komisionit Evropian (DG REGIO), Temis Kristofidu, dhe me drejtoreshën në Drejtoratin e përgjithshëm për zgjërim dhe fqinjësi lindore (DG ENEST) pranë Komisionit Evropian, Valentina Superti. Bisedimet u fokusuan në avancimin e procesit integrues evropian të Maqedonisë së Veriut, zbatimin e reformave dhe thellimin e bashkëpunimit me institucionet e Bashkimit Evropian.
Në bisedën me drejtoreshën e përgjithshme Kristofidu, ministri Murtezani shprehu mirënjohje për mbështetjen e vazhdueshme që Komisioni Evropian e siguron përmes Drejtoratit të përgjithshëm për politikë rajonale dhe urbane, veçanërisht në fushën e bashkëpunimit territorial dhe ndërkufitar. Ai iu referua kryesimit aktual të Maqedonisë së Veriut me Strategjinë e Bashkimit Evropian për Rajonin Adriatiko-Jonian (EUSAIR-in), duke theksuar se vendi, pavarësisht sfidave fillestare, me sukses po i realizon aktivitetet e planifikuara në kuadër të programit të kryesimit. Ministri theksoi se Qeveria mbetet plotësisht e përkushtuar në përforcimin e lidhshmërisë rajonale, promovimin e zhvillimit të qëndrueshëm dhe rritjen e dukshmërisë së vendit brenda iniciativave makrorajonale të Unionit. Të dyja palët u pajtuan për vazhdimin e bashkëpunimit të ngushtë drejt finalizimit të kryesimit dhe përgatitjes së forumit vjetor të EUSAIR-it.
Në takimin me drejtoreshën Superti, u diskutua në detaje për progresin në zbatimin e aktiviteteve reformuese në kontekst të agjendës evropiane, si dhe për prioritetet e Qeverisë për periudhën që vijon. Ministri Murtezani theksoi gatishmërinë e Maqedonisë së Veriut për finalizimin e udhërrëfyesve për administratën publike, sundimin e ligjit dhe investimet e huaja, si dhe për aktivitetet lidhur me Agjendën reformuese dhe Planin për rritje. Në fokus të bisedës ishin edhe pritshmëritë për hapjen e Klusterit 1, si dhe çështjet lidhur me Marrëveshjen për Stabilizim-Asocim dhe masat që ndikojnë në industrinë e çelikut në vendin tonë. Ministri theksoi rëndësinë e integrimit ekonomik dhe qasjes së barabartë në tregun evropian si elemente kyçe për stabilitet dhe zhvillim, ndërsa nga ana e Komisionit Evropian u shprehën për gatishmërinë dhe mbështetjen teknike të mëtejshme dhe koordinimin në zbatimin e reformave.
