Kandidati i koalicionit VLEN për komunën e Sarajit, Muhamed Elmazi, gjatë hapjes së shtabit zgjedhor, u zotua se prioritet kryesor i tij do të jetë zgjidhja e problemit të ujit të pijshëm, një çështje që, sipas tij, ka mbetur e pazgjidhur për dekada.
“Së bashku me ekipin tim vizituam të gjitha vendbanimet, ecëm çdo lagje, takuam të gjithë ata që në këtë parakampanjë zgjedhore na hapën dyert. Problemet janë të shumta, madje dëshpëruese: në shekullin 21, pas 20 vitesh pushtet, ende po flasim për ujë të pijshëm – kjo nuk justifikohet. Para jush marr përsipër: nëse unë si menaxher i ri i komunës së Sarajit nuk e realizoj çështjen e ujit të pijshëm, asnjëherë më nuk do të paraqitem para jush të kërkoj mbështetje politike,” deklaroi Elmazi.
Ai premtoi edhe zhvillimin e potencialit turistik të Sarajit:
“Do ta ringjallim kanionin e Matkës, i cili sot është i mbuluar nga mbeturinat, dhe do ta kthejmë në qendër turistike. Do ta ringjallim liqenin Treska, duke e bërë zemrën e Sarajit dhe njëherit edhe të qytetit të Shkupit.”
Në kuadër të projekteve infrastrukturore, kandidati i VLEN-it paralajmëroi ndërtimin e një rrethrrotullimi në qendër të Sarajit, si dhe zgjerimin e rrugës kryesore, e cila do të shndërrohet në bulevard.
Elmazi prezantoi tri prioritetet e tij kryesore: infrastrukturë moderne, arsim cilësor dhe zhvillim të sportit e kulturës.
