Ministri i Punëve dhe Tregtisë së Jashtme, Timço Mucunski sot deklaroi se mbi 60 për qind e kandidatëve të rinj për ambasadorë janë diplomatë profesionistë nga radhët e të punësuarve në Ministrinë e Punëve të Jashtme dhe Tregtisë së Jashtme, përcjell TV21. Ai konfirmoi se në seancën e fundit të Qeverisë ka propozuar disa emra, të cilët do të konfirmohen pas marrjes së akreditimeve (agremanëve).
“Procesin e emërimit dhe plotësimin e vendeve të shefave të përfaqësive diplomatike-konzullore, sipas Ligjit për Punët e Jashtme, e koordinoj unë, por procesi i tërë nënkupton koordinim me presidenten e shtetit dhe kryeministrin. Pas një koordinimi të tillë, në seancën e fundit të Qeverisë mund të konfirmoj se si ministër i Punëve të Jashtme dhe Tregtisë së Jashtme kam propozuar disa emra për plotësimin e vendeve të shefave të përfaqësive diplomatike-konzullore”, tha Mucunski.
Ai theksoi se mbi 60 për qind e kandidatëve të rinj për ambasadorë dhe konsuj të përgjithshëm janë diplomatë profesionistë nga MPJ&TJ me një karrierë diplomatike mbi 20 vjet, dhe siç nënvizoi, “kjo lidhet me përkushtimin tonë që filloi me ndryshimet dhe plotësimet e Ligjit për Punët e Jashtme”.
“Dua të kujtoj opinionin maqedonas se mbi 20 vjet një pjesë e madhe e paraardhësve të mi flisnin për nevojën e profesionalizimit të shërbimit diplomatik. Por kjo Qeveri është e para që bëri një hap konkret në atë drejtim, dhe ne ndryshuam ligjin për Punët e Jashtme që të paktën 50 për qind e shefave të përfaqësive diplomatike-konzullore të jenë ambasadorë nga stafi profesional i Ministrisë së Punëve të Jashtme, ndërsa në praktikë arrijmë mbi 60 për qind, dhe kjo shihet në grupin e fundit të emërimeve,” tha Mucunski.
Ai shtoi se për shkak se ky informacion është i klasifikuar, nuk mund të konfirmojë emrat, por pas marrjes së agremanëve dhe fillimit të procedurave të brendshme në shtet, emrat do të konfirmohen dhe ata do të prezantojnë propozimet e tyre para Komisionit për Politikë të Jashtme në Parlament.
Sipas disa raportimeve, Qeveria në seancën e së martës miratoi listën e nëntë ambasadorëve të rinj dhe dy konsujve të përgjithshëm në Stokholm, Bukuresht, Prishtinë, Londër, Hagë, Strasburg, Sofje, NATO dhe Sofje, si dhe konsujt e përgjithshëm në Selanik dhe Melburn.
Për ambasador në Suedi është propozuar Muharem Jusufi, kuadër i MPJ&TJ, ndërsa Orhan Murtezani, nga pozita e ministrit për Çështje Evropiane, shkon për ambasador në selinë e NATO-s në Bruksel.
Ish-ambasadori në Ukrainë, Krum Efremov, është propozuar për ambasador në Sofje, në Rumani është propozuar Gabriel Atanasov nga Ministria e Punëve të Jashtme dhe Tregtisë së Jashtme, ndërsa për ambasador në Prishtinë është propozuar Katerina Todorovska.
Linda Salieska Iljazoska nga MPJ&TJ është propozuar për pozicionin e ambasadores në Hagë, ndërsa Ilina Mangova, që vjen nga sektori joqeveritar, është propozuar për ambasadore në Londër. Svetlana Geleva është propozuar për mandat të dytë në Këshillin e Evropës në Strasburg. Në listë përmenden edhe dy emra për konsuj të përgjithshëm – Tomislav Dimitrovski në Selanik dhe Aleksandar Krstevski në Melburn, të dy kuadër të MPJ&TJ.
