Ministria e Punëve të Brendshme njofton se është duke u zhvilluar një aksion i gjerë policor, gjatë të cilit janë sekuestruar sasi të mëdha marijuane.
Në një subjekt juridik në Shkup janë gjetur dhe sekuestruar rreth 9 tonë marijuanë, si dhe mbi 1.300 shishe vaj kanabisi. Ndërkohë, në disa subjekte juridike në rajonin lindor të vendit janë sekuestruar mbi 31 tonë marijuanë dhe biomasë.
Kontrollet janë kryer në bashkëpunim me Drejtorinë e Doganave dhe Ministrinë e Shëndetësisë, në kompani që merren me kultivimin e bimëve mjekësore dhe farmaceutike.
Në bashkëpunim me Prokurorinë për Krim të Organizuar dhe Korrupsion po hetohet edhe mundësia që një pjesë e marijuanës së sekuestruar në Serbi të ketë origjinë nga Maqedonia e Veriut.
Për shkak se një nga personat e arrestuar në Serbi lidhet me subjektin në Shkup, janë kryer kontrolle të detajuara, ku janë konstatuar parregullsi serioze në dokumentacion dhe në sasinë e kanabisit që subjekti posedonte.
Si rezultat, e gjithë sasia e marijuanës është sekuestruar. Parregullsi të ngjashme janë gjetur edhe në disa subjekte në rajonin lindor, ku po ashtu janë sekuestruar sasi të mëdha.
Ministria e Punëve të Brendshme njofton se aksioni do të vazhdojë edhe në ditët në vijim dhe se publiku do të informohet pas përfundimit të hetimeve.
https://www.facebook.com/share/v/1FxNBZzPng/
