‘Një ‘vello e errët’ dixhitale ka rënë mbi Moskën, duke zbuluar pasigurinë psikologjike në rritje në të cilën jeton Vladimir Putin. Javën e kaluar, presidenti rus urdhëroi një mbyllje të plotë të aksesit në internet celular në të gjithë kryeqytetin, një metropol modern me mbi 13 milionë banorë’, shkruan Corriere Della Sera.
Sipas medias italiane një vendim i tillë që nuk u njoftua asnjëherë, por që u zbatua papritur për arsye sigurie të paspecifikuara dhe kohëzgjatja e tij mbetet e panjohur.
Censura gjithnjë e më e rreptë e internetit i shtohet kufizimeve të muajve të fundit. Që nga vera, Kremlini ka kufizuar gradualisht dhe ka bllokuar aplikacionet e mesazheve që konsiderohen të vështira për t’u kontrolluar, të tilla si WhatsApp, Telegram, si dhe platformat sociale si YouTube.
Gazeta italiane më tej nënvizon se ndalimi i ‘Telegram’ ka shkaktuar probleme edhe për ushtarët rusë në frontin ukrainas, të cilët përdorën platformën e krijuar nga Pavel Durov, për të komunikuar.
Në vend të internetit “të vjetër” që ishte i kontrolluar, por ende funksional, udhëheqja ruse promovoi lançimin e një rrjeti të ri social, të kontrolluar nga njerëz jashtëzakonisht të afërt me Putinin. Platforma, e lançuar një vit më parë dhe e quajtur Max, kontrollohet nga kompania shtetërore VKontakte. Administratorët e Max përfshijnë bankierin personal të Putinit, Stepan Kovalchuk, Vladimir Kyriyenko (djali i zëvendëskryetarit të administratës presidenciale) dhe Mikhail Shelomov (djali i kushëririt të presidentit).
Ndërprerja dixhitale në Moskë, zemra e ekonomisë ruse, po e zhyt qytetin në ‘ujëra të paeksploruara’.
Jashtë zonave me Wi-Fi, është e pamundur të bësh pagesa në dyqane me kartë ose aplikacion, të telefonosh një taksi ose shërbim shpërndarjeje përmes një aplikacioni ose të përdorësh ndonjë sistem mesazhesh.
Ky vendim duket se kombinon disa faktorë; frikën e thellë të Putinit, manipulimin politik dhe kontrollin përmes një grupi të mbyllur oligarkësh.
Putin duket se është traumatizuar psikologjikisht nga mënyra se si izraelitët dhe amerikanët përdorën rrjetin lokal celular të Teheranit për të vrarë udhëheqës të tillë si Udhëheqësi Suprem Ali Khamenei dhe Sekretari i Këshillit të Sigurisë Ali Larijani, duke ndjekur lëvizjet e tyre.
Së fundmi, masa i shërben edhe interesave të oligarkëve që përbëjnë “rojën presidenciale” personale të Putinit.
Heqja e çdo platforme tjetër private kënaq “lakminë” e atyre pak njerëzve që kontrollojnë informacionin, pa marrë parasysh pasojat për banorët e Moskës, të gjithë Rusisë dhe sigurisht për Ukrainën, përfundon Corriere Della Sera.
