Nga dita e sotme deri më 26 prill, ministrja e Financave, Gordana Dimitrieska-Koçoska, do të marrë pjesë në takimet pranverore të Fondit Monetar Ndërkombëtar dhe Bankës Botërore, të cilat mbahen në Uashington.
Pjesëmarrja do të jetë një mundësi për ministren që të zhvillojë takime me përfaqësuesit e lartë të FMN-së dhe BB-së, ku do të prezantojë arritjet, planet e ardhshme për politikën fiskale dhe hapat reformues të ndërmarrë nga Qeveria në menaxhimin e financave publike për ruajtjen e stabilitetit makroekonomik.
Ajo do të zhvillojë takime me drejtorin ekzekutiv të FMN-së, Jeron Klik, drejtorin e Njësisë Europiane të FMN-së, Alfred Kamer dhe me shefin e Misionit të FMN-së për Republikën e Maqedonisë së Veriut, Anet Kjob. Njëkohësisht, do të ketë takim edhe me përfaqësuesit e Njësisë së Çështjeve Fiskale pranë Fondit Monetar Ndërkombëtar.
Ministrja do të takohet edhe me përfaqësuesit e lartë të Bankës Botërore, përkatësisht me drejtorin ekzekutiv të Bankës Botërore, Juxhin Rugenat, nënkryetaren Antonela Basani, drejtoreshën rajonale për Ballkanin Perëndimor, Europën dhe Azinë Qendrore, Shiaoçin Ju, si dhe me drejtorin e BB-së në vendin tonë, Masimiliano Paoluçi.
Gjatë qëndrimit në Uashington, ministrja do të takohet edhe me përfaqësuesit e Thesarit të SHBA-së dhe të korporatave multinacionale për shërbime financiare, të përfshira në proceset e emetimit të euroobligacioneve në vendin tonë. Ministrja do të marrë pjesë edhe në Tryezën rajonale për sistemet e pagesave, dedikuar Zonës së Vetme të Pagesave në Euro – SEPA, në kuadër të së cilës këtë vit u anëtarësua edhe vendi ynë.
Takimet pranverore janë evente të rregullta vjetore ndërmjet Grupit të Bankës Botërore dhe FMN-së, ku marrin pjesë ministrat e financave, guvernatorët, përfaqësuesit e komunitetit të biznesit dhe sektorit të shoqërisë civile, akademikët dhe ku po diskutohet për ekonominë globale, zhvillimin ndërkombëtar dhe tregjet financiare.
Ministrja e Financave, Gordana Dimitrieska-Koçoska mori pjesë në Takimet pranverore së bashku me guvernatoren e Bankës Popullore Anita Angellovska Bezhoska. Në përëbërjen e delegacionit ishin dhe zëvendësguvernatorët Ana Mitreska dhe Fadil Bajrami, si dhe sekretarja shtetërore e Ministrisë së Financave, Andriana Matlioska.
Ministrja e Financave, Gordana Dimitrieska-Koçoska, më herët vizitoi Çikagon, SHBA-në, ku mbajti takime me diasporën maqedonase në atë pjesë të SHBA-së.
