Propozim-ligji i ri për mbrojtjen nga pirja e duhanit parashikon rregullimin e të gjitha produkteve me nikotinë, duke përfshirë cigaret, cigaret elektronike (me dhe pa nikotinë), produktet e duhanit të ngrohta, produktet me nikotinë pa tym, si dhe produktet që imitojnë pirjen e duhanit, njoftoi Ministria e Shëndetësisë.
Qëllimi është, siç theksohet, të rregullohet përdorimi i produkteve të reja me nikotinë, duke marrë parasysh se ato krijojnë tym ose një aerosol me substanca të dëmshme, ndërsa sipas hulumtimeve të fundit, këto produkte shpesh krijojnë më lehtë varësi.
Gjithashtu, parashikon ndalimin e prodhimit, importit dhe shitjes së produkteve të nikotinës me: shije frutash, të ëmbla, mentol, bimore dhe shije të tjera që konsiderohen se lehtësojnë përdorimin e parë dhe përshpejtojnë varësinë. Kjo përfaqëson një nga masat më të forta parandaluese në vendet evropiane, informojnë nga Ministria.
“Qëllimi kryesor i këtij segmenti të ligjit është mbrojtja e shëndetit të popullatës së re, për të cilën hulumtimet më të fundit tregon se te nxënësit e moshës 13 deri në 15 vjeç, gjithsej nëntë për qind aktualisht përdorin cigare elektronike, 4,9 për qind e nxënësve aktualisht përdorin produkte duhani të ngrohta, dhe 10,6 për qind raportuan se i kanë përdorur ndonjëherë ato” shpjegon ministri i Shëndetësisë, Azir Aliu.
Në të njëjtën kohë, propozim-ligji për mbrojtjen nga pirja e duhanit është harmonizuar me politikatglobale të shëndetit publik dhe udhëzimet e Organizatës Botërore të Shëndetësisë përmes Konventës Kornizë për Kontrollin e Duhanit. Ai krijon një sistem gjithëpërfshirës, i cili ndjek parimet kryesore të konventës: mbrojtja nga ekspozimi ndaj tymit, kufizimi i marketingut, promovimi, parandalimi i ndikimit industrial përmes sponsorizimeve, kontrolli i disponueshmërisë dhe masat për parandalimin dhe mbështetjen për lënien e duhanit, thuhet në komunikatë.
