Ministria e Administratës ka reaguar ndaj akuzave të partisë BDI, duke i quajtur dezinformata pohimet e bëra nga kjo e fundit në lidhje me humbjen e kompetencave të Ministrit të Mjedisit Jetësor dhe Planifikimit Hapësinor.
Në një deklaratë të Ministrisë së Administratës, theksohet se BDI ka shpërndarë informacione të pasakta lidhur me një inspektim të Inspektoratit të Administratës, duke pretenduar se ky institucion ka gjetur parregullsi në ministrinë përkatëse. Ministria sqaron se Inspektorati i Administratës Shtetërore nuk ka asnjë kompetencë për t’u marrë me kompetencat e ministrave, as për të udhëhequr hetime lidhur me korrupsionin, çështje që janë në juridiksionin e autoriteteve gjyqësore, të cilat, sipas Ministrisë, BDI i ka bllokuar për vite me radhë në përpjekje për t’u mbrojtur nga përgjegjësia.
Ministria sqaroi gjithashtu se inspektimi i realizuar ka qenë një kontroll i rregullt, në përputhje me Planin Vjetor të Punës për vitin 2024, dhe se ai ka pasur si qëllim vetëm mbikëqyrjen e respektimit të procedurave ligjore, pa lidhje me akuzat e ngritura nga BDI.
