Ministri i Jashtëm iranian, Abbas Araghchi, deklaroi në një intervistë për Al Jazeera se Teherani dhe Uashingtoni kanë rënë dakord për organizimin e një raundi të dytë bisedimesh, megjithëse ende nuk është caktuar një datë konkrete.
Ai shtoi se të dyja palët e konsiderojnë të rëndësishme që ky raund të zhvillohet “së shpejti”, duke lënë të hapur mundësinë e rifillimit të menjëhershëm të kontakteve.
Pyetur për rrezikun e një konflikti të mundshëm me SHBA, Araghchi theksoi se një mundësi e tillë ekziston gjithmonë, por nënvizoi se Irani është i gatshëm si për një zgjidhje paqësore, ashtu edhe për luftë.
Ai siguroi gjithashtu vendet fqinje se, në rast një sulmi nga SHBA, forcat iraniane do të synojnë vetëm bazat amerikane në rajon dhe jo vendet pritëse të tyre.
“Nuk do të sulmojmë vendet fqinje, do të synojmë bazat amerikane që ndodhen atje. Ka një diferencë të madhe mes të dyjave”, theksoi ai.
Megjithëse të dyja palët kanë shfaqur gatishmëri për të rivendosur dialogun rreth çështjes së zgjatur bërthamore të Teheranit me Perëndimin, Araghchi theksoi se bisedimet do të kufizohen vetëm në këtë temë.
“Çdo dialog kërkon heqje dorë nga kërcënimet dhe presioni. Teherani diskuton vetëm çështjen bërthamore… Nuk diskutojmë asnjë temë tjetër me SHBA-në”.
