Ministri Durmishi, në hapjen e konferencës rajonale për vullnetarizmin, njoftoi fillimin zyrtar të reformës së Ligjit për Vullnetarizmin në Maqedoninë e Veriut, në përputhje me standardet evropiane.
Ai theksoi se vullnetarizmi është një nga shtyllat kryesore të solidaritetit shoqëror dhe se ndryshimet ligjore janë të domosdoshme për t’iu përshtatur formave të reja të angazhimit vullnetar, si vullnetarizmi digjital dhe reagimi në situata krize.
“Po hapim një proces të gjerë dhe gjithëpërfshirës, që do të përfshijë organizatat civile, vullnetarët dhe institucionet lokale,” deklaroi ministri Durmishi, duke theksuar se reforma synon rritjen e mbështetjes dhe sigurisë ligjore për të gjithë vullnetarët.
Konferenca shënon pikënisjen e dialogut rajonal për ngritjen e standardeve të vullnetarizmit dhe forcimin e bashkëpunimit mes vendeve të rajonit.
