Sot nuk promovojmë vetëm një dokument strategjik. Sot po konfirmojmë vendosmërinë tonë për të ndërtuar një shtet modern, të zgjuar dhe digjital. Një shtet që punon për qytetarët, një shtet që është transparent, efikas dhe i drejtë.
Strategjia Nacionale Zhvillimore e TIK – SMART/MK 2030 është vizion, por edhe një plan i qartë. Ajo është përgjigje ndaj sfidave reale me të cilat ballafaqohet shoqëria jonë dhe një udhërrëfyes se çfarë shteti duam të jemi në dekadën e ardhshme.
Transformimi digjital nuk është vetëm vendosja e teknologjive të reja. Ajo është një proces sistemik që nënkupton ndryshim të thellë në mënyrën se si funksionon shteti, në kulturën e institucioneve dhe në raportin ndaj qytetarëve dhe bizneseve. Ajo do të thotë shërbime më të thjeshta dhe më të shpejta, më pak burokraci, më shumë llogaridhënie dhe pjesëmarrje më të madhe të qytetarëve në krijimin e politikave publike.
Si Qeveri, digjitalizimin e kemi vendosur si një nga prioritetet tona kryesore strategjike. Kjo sepse e dimë që shteti digjital është parakusht për sundimin e ligjit dhe luftën efikase kundër korrupsionit. Kur proceset janë digjitale, gjurma është e dukshme dhe përgjegjësia është e qartë. Kur sistemet janë të lidhura, nuk ka hapësirë për keqpërdorime, selektivitet apo privilegje.
Strategjia SMART/MK 2030 formëson rrugën e transformimit digjital të Republikës së Maqedonisë së Veriut në përputhje me specifikat, vlerat dhe interesat tona shtetërore afatgjata. Ajo paraqet një udhërrëfyes të detajuar dhe real për tejkalimin e sfidave zhvillimore në fushën e teknologjisë së informacionit dhe komunikimit, duke siguruar zhvillim të përshpejtuar digjital në të gjithë sektorët – nga administrata publike, përmes arsimit dhe shëndetësisë, e deri te ekonomia dhe zhvillimi lokal.
Ky dokument bazohet në parimet dhe udhëzimet e përcaktuara në Udhërrëfyesin për Transformimin Digjital, dhe njëkohësisht është plotësisht i harmonizuar me Strategjinë Nacionale Zhvillimore 2024 – 2044, ku zhvillimi i kapitalit njerëzor dhe digjitalizimi i shoqërisë njihen si shtytësit qendrorë të përparimit. Nuk ka ekonomi të fortë pa aftësi digjitale. Nuk ka shoqëri moderne pa qytetarë me aftësi digjitale. Dhe nuk ka shtet konkurrues pa një sektor inovativ të TIK-ut.
Vlerë e veçantë e kësaj strategjie është se ajo adreson me saktësi prioritetet afatshkurtra dhe afatmesme të përcaktuara në Programin Kombëtar për miratimin e legjislacionit të BE-së. Miratimi i kësaj strategjie, si dhe harmonizimi me legjislacionin evropian në fushën e komunikimeve elektronike, digjitalizimi i regjistrave institucional, vendosja e punës në “Cloud”, si dhe avancimi i kornizës ligjore për identifikimin elektronik dhe shërbimet e besueshme, janë një sinjal i qartë se ne jemi gati për standardet digjitale evropiane.
Megjithatë, strategjitë në vetvete nuk mjaftojnë. Obligimi ynë është që këtë vizion ta shndërrojmë në politika konkrete, rezultate të matshme dhe ndryshime reale në jetën e përditshme të qytetarëve. Të ndërtojmë një shtet ku shërbimet janë të aksesueshme me një klikim, institucionet komunikojnë mes vete dhe qytetari është në qendër të sistemit.
SMART/MK 2030 nuk është një dokument për një institucion apo për një qeveri. Ajo është një obligim i përbashkët – i institucioneve, sektorit privat, komunitetit akademik dhe shoqërisë civile. Vetëm me partneritet, njohuri dhe besim mund të ndërtojmë një shtet digjital që do të jetë shtytës i rritjes ekonomike dhe garanci për një jetë cilësore.
Më lejoni të përfundoj duke shprehur mirënjohjen time të sinqertë për Ministrin e Transformimit Digjital, Stefan Andonovski, për angazhimin dhe vizionin e tij të përkushtuar në procesin e përgatitjes dhe hartimit të Strategjisë Nacionale Zhvillimore e TIK-ut – SMART/MK 2030.
Sot po vendosim bazat. Qëllimi ynë është i qartë – Maqedoni e zgjuar, digjitale dhe e drejtë deri në vitin 2030. Një Maqedoni që sheh përpara, që investon në njohuri, teknologji dhe njerëz. Një Maqedoni që e ndërton të ardhmen, e nuk e pret atë.
