Kryetari i Qeverisë së Republikës së Maqedonisë së Veriut, Hristijan Mickoski, në cilësinë e kryetarit të Këshillit Nacional për Zhvillim, sot e hapi seancën e katërt të Këshillit, i cili sipas tij, si trup këshillëdhënës i përhershëm i Qeverisë, ka një rol jashtëzakonisht të rëndësishëm në formësimin e vizionit afatgjatë dhe rrugës së zhvillimit të shtetit.
“Me kënaqësi të veçantë e përshëndes praninë tuaj dhe ju falënderoj për përkushtimin e vazhdueshëm, ekspertizën dhe mbështetjen që ia jepni punës së Këshillit Nacional për Zhvillim. Pjesëmarrja juaj aktive është dëshmi se në vend ekziston kapacitet, vullnet dhe pjekuri për planifikim të përbashkët, të përgjegjshëm dhe vizionar të së ardhmes,” theksoi Mickoski dhe shtoi:
“Këshilli Nacional për Zhvillim, si bartës i strukturës drejtuese në kuadër të Strategjisë Nacionale Zhvillimore, përfaqëson një forum unik ku, përmes përfshirjes së përfaqësuesve të të gjithë palëve shoqërorë të interesuar, diskutohen tema dhe çështje kyçe që lidhen me zhvillimin afatgjatë, strategjik dhe të qëndrueshëm të shtetit. Ky Këshill nuk është vetëm një kornizë formale institucionale – ai është një hapësirë për dialog, për debat të argumentuar, për ndërtimin e besimit dhe për krijimin e përgjigjeve të përbashkëta ndaj sfidave komplekse me të cilat ballafaqohemi”.
Siç informoi Kryeministri Mickoski, me një qasje konsensuale, përfshirje të gjerë dhe inkluzivitet të qartë, duke respektuar parimet e transparencës, llogaridhënies dhe partneritetit, u miratua Strategjia Nacionale Zhvillimore për periudhën 2024–2044, me ç’rast u vendosën themelet e drejtimit afatgjatë zhvillimor – një dokument që për herë të parë, në mënyrë sistematike dhe gjithëpërfshirëse, e përcakton vizionin se ku dëshirojmë të jemi si shtet në dy dekadat e ardhshme.
“Në periudhën e kaluar, pas miratimit të këtij dokumenti strategjik, si dhe në kohën që nga mbajtja e Seancës së tretë të Këshillit Nacional për Zhvillim, u realizuan disa aktivitete të rëndësishme që lidhen me zbatimin e tij. Procesi i zbatimit dhe monitorimit të realizimit vazhdoi me përfshirjen e një game të gjerë palësh të interesuara – qytetarë, ekspertë, akademikë, përfaqësues të komunitetit të biznesit dhe organizata të shoqërisë civile. Kjo qasje e hapur dhe pjesëmarrëse është forca jonë dhe garanci se strategjia nuk do të mbetet dokument ‘në letër’, por do të shndërrohet në politika reale dhe rezultate të matshme”, theksoi Mickoski.
Ai njoftoi se anëtarët e Qeverisë ishin informuar në mënyrë të detajuar për masat e propozuara që dolën nga takimet e para të Komitetit të Punues, përfundimisht deri në mars të vitit 2025, dhe se ministritë dhe organet e tjera të administratës shtetërore u obliguan të ndërmarrin aktivitete konkrete për realizimin e mëtejmë të tyre, me ç’rast, sipas tij, edhe një herë u konfirmua përkushtimi për një qasje serioze dhe të përgjegjshme ndaj zbatimit të strategjisë.
“Veçanërisht dua ta përshëndes dhe ta theksoj punën e Komitetit të Punues, përmes të cilit sigurohen forume tematike për diskutim dhe shkëmbim mendimesh në kontekstin e Strategjisë Nacionale Zhvillimore. Edhe pse jemi ende në fillim të këtij procesi të gjatë, praktika e deritanishme tashmë sinjalizon qartë se publiku dhe palët e interesuara janë të gatshme të kontribuojnë në mënyrë aktive, së bashku t’i identifikojmë sfidat dhe së bashku të krijojmë udhëzime për tejkalimin e tyre. Kjo është thelbi i menaxhimit modern dhe të përgjegjshëm të zhvillimit të shtetit, por edhe një parakusht kyç për përmbushjen e suksesshme të obligimeve në kuadër të procesit të integrimeve evropiane”, theksoi Mickoski.
Ai theksoi se formimi i Grupit ndërpartiak parlamentar për ndjekjen e progresit të strategjisë është një konfirmim se Strategjia Nacionale Zhvillimore është rezultat i një konsensusi të gjerë shoqëror, që është një mesazh i fortë për pjekuri dhe përgjegjësi politike.
“Fakti që Strategjia Nacionale Zhvillimore është rezultat i një konsensusi të gjerë shoqëror u konfirmua edhe një herë me formimin e Grupit ndërpartiak parlamentar për ndjekjen e progresit të strategjisë, më 16 maj të këtij viti në Kuvend.
Kjo përbën një mesazh të fortë për pjekuri dhe përgjegjësi politike, por edhe një mekanizëm shtesë për sigurimin e koordinimit ndërmjet pushtetit legjislativ dhe atij ekzekutiv, si dhe palëve të tjera të interesuara përkatëse, me qëllim promovimin e të menduarit strategjik afatgjatë, politikave gjithëpërfshirëse, transparencës dhe llogaridhënies.
Pikërisht kjo qasje – e hapur, gjithëpërfshirëse dhe e bazuar në dialog – kontribuon gradualisht në krijimin e një kornize strategjike të qëndrueshme me një vizion të qartë për zhvillim. Një vizion që nënkupton një ekonomi konkurruese dhe stabile, rritje të qëndrueshme, kohezion dhe siguri shoqërore, revitalizim demografik, tranzicion të suksesshëm të gjelbër, si dhe forcim sistematik të kapitalit njerëzor dhe kapaciteteve inovative, me theks të veçantë në transformimin digjital – duke dërguar një mesazh të fuqishëm për pjekuri dhe përgjegjësi politike”.
“Strategjia Nacionale Zhvillimore është krijuar për të qenë udhërrëfyes i zhvillimit – një dokument i gjallë që do ta ndjekim, do ta përmirësojmë dhe mbi bazën e të cilit do ta vlerësojmë suksesin e politikave tona. Pikërisht për këtë arsye, paralelisht me zbatimin e saj, po punojmë intensivisht edhe në vendosjen e një sistemi gjithëpërfshirës për monitorim, raportim dhe vlerësim”, deklaroi Mickoski.
Duke theksuar obligimin e Qeverisë që deri në mars të vitit të ardhshëm ta dorëzojë raportin vjetor për zbatimin e Strategjisë Nacionale Zhvillimore për vitin 2025, ai tha se kjo kërkon koordinim të forcuar ndërmjet institucioneve, shpërndarje të qartë të përgjegjësive dhe promovim e pozicionim shtesë të strategjisë, si dokumenti më i lartë strategjik planifikues – një dokument që e drejton tërë kornizën strategjike, e orienton planifikimin sektorial dhe mundëson krijimin e politikave gjithëpërfshirëse, efikase dhe të bazuara në dëshmi.
“Qëllimi ynë është i qartë: zhvillim afatgjatë, i qëndrueshëm dhe i drejtë, zhvillim që do të sigurojë cilësi më të mirë të jetës për të gjithë qytetarët, stabilitet ekonomik, siguri institucionale dhe një shtet të përgatitur për t’u përballur me sfidat e ardhshme”, ishte i prerë Kryetari i Qeverisë së Republikës së Maqedonisë së Veriut, Hristijan Mickoski, duke shprehur bindjen se me punë të përbashkët, partneritet dhe vizion, Këshilli Nacional për Zhvillim do të vazhdojë të jetë shtyllë e këtij transformimi dhe nxitës i ndryshimeve që i meriton vendi.
