Jetojmë në një kohë ndryshimesh të thella dhe të shpejta globale. Një kohë në të cilën rrjedhat ekonomike, tregjet financiare dhe sfidat e sigurisë ndërthuren më shumë se kurrë më parë. Në një botë të tillë, roli i bankingut qendror bëhet edhe më i rëndësishëm – jo vetëm si ruajtës i stabilitetit të çmimeve, por edhe si shtyllë e besimit, stabilitetit dhe qëndrueshmërisë ekonomike.
Bankat qendrore sot nuk veprojnë në kushte të izoluara. Ato funksionojnë në një mjedis që ndikohet fuqishëm nga goditjet globale – nga presionet e inflacionit dhe ndërprerjet në zinxhirët e furnizimit, deri te tensionet gjeopolitike dhe pasiguritë energjetike. Në rrethana të tilla, stabiliteti nuk është i dhënë – ai është rezultat i politikave të kujdesshme, koordinimit dhe vendosmërisë.
Konflikti ushtarak në Lindjen e Mesme i ka thelluar edhe më tej këto sfida. Jemi dëshmitarë të çrregullimeve të konsiderueshme në tregjet e energjisë, rritjes së çmimeve të naftës dhe gazit, si dhe të një pasigurie të shtuar që reflektohet drejtpërdrejt në ekonominë globale. Këto presione nuk mbeten larg kufijve tanë – ato ndikojnë në inflacion, në kostot e prodhimit dhe në standardin e jetesës së qytetarëve.
Në një mjedis të tillë, bankat qendrore kanë një përgjegjësi të dyfishtë. Së pari, të ruajnë stabilitetin e çmimeve dhe të amortizojnë goditjet e inflacionit. Së dyti, të mbrojnë stabilitetin financiar duke siguruar likuiditet dhe siguri në sistemin bankar. Kjo kërkon një ekuilibër të kujdesshëm – midis masave restriktive për kontrollin e inflacionit dhe mbështetjes së aktivitetit ekonomik.
Por stabiliteti në vetvete nuk është i mjaftueshëm. Në kohë të transformimeve, nevojitet edhe guxim për inovacion. Digjitalizimi i sektorit financiar, zhvillimi i zgjidhjeve fintek, modernizimi i sistemeve pagesore – të gjitha këto hapin mundësi të reja për një sistem financiar më të shpejtë, më efikas dhe më gjithëpërfshirës. Bankat qendrore janë tashmë aktorë aktivë në këtë transformim, duke krijuar korniza që nxisin inovacionin, por njëkohësisht mbrojnë stabilitetin.
Si shtet, ne e ndjekim në mënyrë aktive këtë rrugë. Ndërtojmë sistem financiar të qëndrueshëm dhe rezistent, të harmonizuar me standardet evropiane. Politika jonë është e qartë – institucione të forta, transparencë dhe përgjegjësi. Në bashkëpunim me Bankën Popullore dhe me të gjitha institucionet relevante, punojmë për përmirësimin e kornizës rregullatore, forcimin e mbikëqyrjes dhe mbështetjen e transformimit digjital.
Në të njëjtën kohë, Qeveria reagoi në kohë dhe me vendosmëri për të zbutur goditjet e drejtpërdrejta ndaj qytetarëve dhe ekonomisë. Morëm masa për uljen e TVSH-së për karburantet, duke ndikuar drejtpërdrejt në uljen e presionit të çmimeve mbi familjet dhe bizneset.
Sot kemi mbledhje të rregullt të qeverisë dhe do të shqyrtojmë edhe masa të tjera që besojmë se do të jenë të dobishme në këtë drejtim. Edhe pse, pavarësisht këtyre goditjeve të çmimeve, duhet të pranoj se kemi bindshëm çmimet më të ulëta të benzinës dhe naftës në rajon, gjë që krijon një presion shtesë nga vendet fqinje, përkatësisht nga qytetarët e tyre dhe mund të vërejmë se konsumi i benzinës dhe naftës në pikat tona të karburantit është rritur me më shumë se 10%, megjithatë, furnizimi i qëndrueshëm për qytetarët dhe ekonominë mbetet prioriteti ynë dhe në këtë moment nuk ka pritshmëri negative, përkundrazi, mbetet qëllimi ynë të sigurojmë sasi të mjaftueshme si për qytetarët tanë, ashtu edhe për ata nga vendet fqinje, nëse kjo kontribuon në përmirësimin e standardit të tyre të jetesës.
Ky është shembull i një qasjeje të koordinuar – ku politika monetare dhe ajo fiskale plotësojnë njëra-tjetrën, dhe institucionet veprojnë në mënyrë të sinkronizuar në interes të qytetarëve.
Qëndrueshmëria është fjala kyçe e kohës sonë. Ajo nënkupton aftësinë për t’i përballuar goditjet, por edhe për të dalë më të fortë prej tyre. Kjo do të thotë diversifikim i ekonomisë, financa publike të qëndrueshme dhe besim në institucione. Bankat qendrore janë në zemër të kësaj qëndrueshmërie. Guvernatorët duhet të respektojnë ligjin dhe të jenë pjesë e forcës shtytëse.
Sot, më shumë se kurrë, kemi nevojë për koordinim – ndërmjet bankave qendrore, qeverive dhe partnerëve ndërkombëtarë. Sfidat globale kërkojnë përgjigje të përbashkëta. Vetëm përmes bashkëpunimit mund të ndërtojmë një sistem që do të jetë i qëndrueshëm, inovativ dhe i gatshëm për të ardhmen.
Më lejoni ta përfundoj me një mendim: stabiliteti është themeli, inovacioni është shtytësi, ndërsa qëndrueshmëria është garancia për të ardhmen. Nëse i bashkojmë këto tri shtylla, do të ndërtojmë një ekonomi që jo vetëm do t’i përballojë sfidat, por do t’i shndërrojë ato në mundësi.
Koha në të cilën jetojmë nuk është e lehtë, por është kohë vendimesh. Shpesh them se po të ishte e lehtë, nuk do të ishim ne.
Është kohë vizioni. Kohë në të cilën vendosim themelet e stabilitetit të së nesërmes.
