Qytetarët do të kenë çmim më të ulët të karburantit për 2,5 denarë, deklaroi kryeministri Hristijan Mickoski. Ky vendim erdhi pasi OKTA vendosi që të gjitha kompanitë që furnizohen me karburant prej saj të kenë zbritje të derivateve të naftës për rreth 2 denarë për litër. Kryeministri tha se ka biseduar edhe me pronarët e pikave të karburantit, të cilët i kanë premtuar se qytetarët do ta ndiejnë çmimin më të ulët. OKTA furnizon rreth 70 deri në 80 për qind të kompanive me karburant në vend.
“Ditëve të Fundit punuam së bashku me Ministrinë e Energjetikës me furnizuesin më të madh, që është OKTA. Lajm i mirë për qytetarët është se OKTA për kompanitë që bashkëpunojnë me të, nga sot do të japë zbritje, përafërsisht 45 deri në 50 dollarë për ton. Kjo do të thotë ulje diku rreth 2,5 denarë për litër. Pastaj bisedova edhe me një pjesë të madhe të pronarëve të pikave të karburantit, të cilët thanë se këtë do ta përcjellin te përdoruesit final”, deklaroi Hristijan Mickoski, kryeministër.
“Që nga nesër e deri në fund të muajit, ne vendosim zbritje prej 2 denarë për dizelin dhe benzinën për tregtarët me shumicë dhe pakicë që furnizohen me karburante nga OKTA. Në këtë mënyrë ne u mundësojmë këtyre kompanive që më tej ta përcjellin këtë përfitim te konsumatorët”, thotë Dimitros Pashos, drejtor ekzekutiv i OKTA-s.
Ministrja e Energjetikës Sanja Bozhinovska siguroi se situata me naftën në vend është e qëndrueshme. Shtoi se kompanitë kanë rezerva të mjaftueshme.
“Në kohën kur tregjet botërore të energjisë janë nën presion dhe çmimet ndikohen nga zhvillimet globale çdo nismë që mund të kontribuojë në lehtësimin e presionit ndaj qytetarëve dhe bizneseve është me rëndësi”,tha Sanja Bozhinovska- Ministre e Energjetikës.
Pas luftës në Lindjen e Mesme, çmimet në tregjet globale u rritën ndjeshëm, ndërsa çmimi i naftës në bursë lëviz nga 98 deri në 100 dollarë për fuçi. Agjencia Ndërkombëtare e Energjisë njoftoi se do të lirojë 400 milionë fuçi naftë nga rezervat e saj, që është sasia më e madhe ndonjëherë në histori./Alsat.mk.
