Kryeministri Hristijan Mickoski në seancën e sotme të Kuvendit për pyetje të deputetëve, duke folur për Planin për Rritje dhe Agjendën Reformuese, duke shpjeguar në detaje hapat dhe ligjet që duhet të zbatohen, theksoi se deri në fund të këtij viti do të përpunohen një pjesë e hapave dhe procedurave, ndërsa ato që do të mbeten pas do të realizohen në tre muajt e parë të vitit të ardhshëm që të mund të kapet ritmi.
“Ligji për shërbime audiovizuale është pjesë e Ministrisë për Transformim Digjital dhe në përgjithësi është gati. Me këtë ligj, ne dëshironim që të përfshiheshin edhe pjesët që kanë të bëjnë me ‘roam at home’, pra që të rinjtë kur udhëtojnë nëpër Evropë të mos paguajnë roaming, por kjo do të implementohet vitin e ardhshëm. Ne kemi ambicie ta miratojmë ligjin këtë vit, ndërsa vitin e ardhshëm përmes amendamenteve të intervenojmë për roamingun,” deklaroi kryeministri Mickoski.
Kryeministri Mickoski shtoi se hapi i radhës, i cili është i rëndësishëm, janë ndryshimet në Kodin Zgjedhor që duhet të harmonizohen me rekomandimet e OSBE-së dhe ODIHR-it dhe se kjo varet nga konsensusi politik. Meqenëse është një ligj reformues, ky konsensus mund të arrihet dhe ligji të miratohet deri në fund të vitit me rekomandimet e OSBE-së dhe ODIHR-it të përfshira.
“Hapi i radhës po ashtu është i rëndësishëm dhe nuk mund ta përmbushim, e ka të bëjë me energjetikën – liberalizimi i plotë i tregut të energjisë elektrike, para së gjithash për amvisëritë. Sepse nëse Qeveria ndalon subvencionimin e energjisë elektrike për amvisëritë, atëherë çmimi do të shtrenjtohet rreth 30%–35% dhe kjo do të shkaktojë inflacion dhe efekt zinxhiror mbi shumë procese të tjera. Prandaj, ne si shtet vazhdojmë t’i subvencionojmë faturat e energjisë elektrike për amvisëritë dhe për të gjithë në tregun e rregulluar,” theksoi Mickoski.
Kryeministri Mickoski nënvizoi se hapi tjetër i rëndësishëm janë ligjet në sektorin e drejtësisë.
“Këto janë ligjet për prokurorinë publike, për gjykatat, për shërbimin e prokurorisë publike dhe për shërbimin në gjykata, që kanë të bëjnë me dy çështje: e para, që gjykatat dhe prokuroritë të mund të punësojnë vetëm me miratimin e Këshillit Gjyqësor dhe Këshillit të Prokurorëve Publikë, ndërsa Qeveria të njoftohet — çka është në rregull. Por nuk mund të pajtohemi me mjetet që duhet t’i ndajmë nga buxheti për t’i rritur të ardhurat. Nëse ankohen me 3.000–4.000 euro të ardhura mujore, atëherë si e kanë hallin fëmijët nëpër kopshte që s’kanë as lodra për të luajtur? Ky është buxheti, e kanë vjedhur, kanë mbetur pak para dhe me ato që kanë mbetur përpiqemi t’i menaxhojmë siç duhet ato që kanë mbetur, po i rinovojmë kopshtet, shkollat dhe vlerësojmë se këto janë prioritet më i madh sesa rritja e pagave të gjyqtarëve dhe prokurorëve. Besojmë se është e drejtë,” theksoi Mickoski.
Kryeministri shtoi se hapi i radhës që ka kaluar në procedurë qeveritare është ligji i ri për Këshillin Gjyqësor, i cili po harmonizohet me Zyrën e Komisionit Europian dhe së shpejti do të dërgohet në Kuvend.
“Më pas vjen pjesa për publikimin e regjistrit të kompanive në të cilat shteti ka njëfarë pjesëmarrjeje, jo dominuese, por njëfarë pjesëmarrjeje, pra ndërmarrje ku shteti është pronar. Ligjin e përgatitëm bashkë me profesorë nga Fakulteti Juridik, e dorëzuam në Ministrinë e Ekonomisë dhe Punës dhe në Ministrinë për Çështje Evropiane dhe presim që së shpejti të harmonizohet dhe në dhjetor të dërgohet në Kuvend. Më tej ka pjesë ku taksat dhe procedurat që duhet të harmonizohen në tre institucione e ato janë Regjistri Qendror, MALMED (Agjencia e Barnave) dhe Ministria e Ekonomisë dhe Punës në pjesën e Regjistrit Qendror kjo ka përfunduar, këto janë gjashtë, në MALMED janë 19, dhjetë të harmonizuara, nëntë do të harmonizohen dhe mbeten edhe tre në Ministrinë e Ekonomisë dhe Punës. Kjo do të përfundojë brenda këtij viti. Më pas kemi liberalizimin e trafikut hekurudhor në pjesën e infrastrukturës dhe transportit dhe tashmë është zhvilluar takim me Zyrën e Komisionit Evropian dhe janë dakorduar aktivitetet. Po ashtu kemi kompletimin e punësimeve në Agjencinë për pronë të konfiskuar dhe vendet e punës do të plotësohen,” deklaroi kryeministri Mickoski.
