Kryeministri Hristijan Mickoski, në emisionin “Tema e ditës” në Ditarin e Sitelit, duke komentuar pretendimet e Zhan Mitrevit se gjatë qeverisjes së mëparshme ka pasur një përpjekje për marrjen e spitalit të tij nga Zoran Zaev dhe Venko Filipçe, theksoi se Prokuroria duhet ta thërrasë Zhan Mitrevin që të paraqesë prova për ato që thotë, sepse vetëm kështu do të zbulohet më lehtë nëse këto pretendime janë të vërteta.
“Pretendimet e Zhan Mitrevit janë pretendime të një viktime të njerëzve nga pushteti i mëparshëm. Unë nuk e di nëse dikush nga Prokuroria e ka thirrur Zhan Mitrevin që të dëshmojë dhe të paraqesë prova, ky është thelbi. Pres që prokurori ose prokurorja e ardhshme, nuk ka rëndësi kush do të zgjidhet, ta ketë këtë si detyrë të parë. Ta thërrasë Zhanin, nëse deri më tani askush nuk e ka bërë këtë, ta thërrasë, sepse njeriu doli publikisht dhe tha se ka qenë objekt shantazhi nga funksionarë të lartë shtetërorë.”
Ai shtoi gjithashtu se ka shumë raste të tilla korrupsioni që duhet të hetohen dhe se pret që me Prokurorin e ri Publik, i cili pritet të zgjidhet, këta persona të inkurajohen dhe me prova të raportojnë në Prokurori.
“Ky është thelbi. Nuk është thelbi nëse Zoran Zaev ka paraqitur padi për shpifje kundër X-it apo Y-it. Thelbi është nëse Prokuroria jonë e ka thirrur atë që pretendon ose ata që pretendojnë , sepse nuk është vetëm ai. Mua personalisht më kanë ardhur shumë njerëz që kanë dëshmuar se kanë qenë viktima të shantazhit nga qeveria e mëparshme. Në përbërjen e mëparshme të Prokurorisë e kuptoj — kishin frikë, kishte prokuror të zgjedhur nga shumica e mëparshme, ndoshta nuk kishin besim, nuk e di, por pres që me Prokurorin e ri Shtetëror Publik, të gjithë ata që vijnë tek unë dhe raportojnë se kanë qenë viktima të shantazhit, të marrjes armiqësore të bizneseve etj., të raportojnë me prova se si janë paguar faturat në KXE Manastir, e si përfundojnë ato në mënyrë magjike në kompani në Bullgari, etj. Këtu kemi një përfshirje më të gjerë të gjërave,” theksoi Mickoski dhe shtoi:
“Ky është thelbi. A e ka thirrur dikush në Prokurorinë Publike Zhan Mitrevin që të japë deklaratë dhe prova? Kështu do ta dimë më lehtë nëse është e vërtetë apo jo. Nëse dikush del rastësisht dhe thotë diçka apo nëse nuk është ashtu.”
