Sot e promovojmë mjetin e rëndësishëm i cili mundëson funksionimin bashkëkohor të shtetit – Platformën e re për monitorimin e projekteve të financuara nga Qeveria. Ky nuk është vetëm sistem teknik. Ky është një hap përpara në kulturën politike, një hap drejt menaxhimit modern dhe një mesazh i fuqishëm se shteti të cilin e udhëheqim do të jetë i hapur, llogaridhënës dhe do të ofrojë pasqyrë të plotë se ku përfundon çdo denar i mjeteve publike. Kjo Platformë simbolizon qartë përkushtimin tonë ndaj integritetit, ndershmërisë dhe mbikëqyrjes publike mbi të gjitha investimet që i realizojmë, pa përjashtim.
Për herë të parë në historinë e Maqedonisë vendosim një sistem ku çdo qytetar, çdo komunë, çdo gazetar, çdo përfaqësues i sektorit civil dhe çdo faktor relevant do të mund në kohë reale, në mënyrë transparente dhe të saktë, të ndjekë ecurinë e projekteve që financohen nga Qeveria. Pikërisht kështu duhet të funksionojë një shtet evropian. Me këtë Platformë e hapim punën e institucioneve dhe vendosim një kornizë të re të besimit, ku opinioni nuk pret përgjigje – por i ka ato para vetes.
Transparenca për ne nuk është detyrim formal. Ajo është një rregull thelbësor demokratik. Është baza e besimit. Baza e stabilitetit. Baza e politikave vërtet të përgjegjshme. Në një shoqëri që çdo ditë përballet me narrativa të rreme, dezinformata dhe manipulime, e vetmja përgjigje është – shtet i hapur me të dhëna të hapura. Prandaj kjo Platformë është së dyti projekt teknologjik, ndërsa primarisht – mesazh politik: nuk kemi çfarë të fshehim, sepse punojmë ndershëm, në mënyrë transparente dhe në interes të qytetarëve.
Veçanërisht e rëndësishme është që mediat, si shtyllë e demokracisë, fitojnë një mjet të fuqishëm. Me vetëm disa klikime do të mund të ndjekin çdo projekt, çdo kontratë, çdo afat dhe çdo fazë të realizimit. Kjo nënkupton mbështetje të vërtetë për gazetarinë hulumtuese, për llogaridhënien publike dhe për pjesëmarrjen e informuar qytetare. Asnjë projekt më nuk është “diku atje”, i fshehur në labirintet institucionale. Tani është publik, i dukshëm dhe i verifikueshëm.
Më lejoni t’i prezantoj rezultatet, sepse shifrat flasin më së miri.
Nga thirrja e parë publike e financuar përmes mjeteve të siguruara nga Qeveria, janë përfshirë gjithsej 288 projekte me vlerë totale prej rreth 4,6 miliardë denarësh, gjegjësisht gati 75 milionë euro. Sot mund të themi me përgjegjësi se të gjitha 288 projektet janë filluar. Për të gjitha janë lidhur kontrata me operatorët ekonomikë. Kjo do të thotë se nuk ka vonesa, nuk ka rrugë të zbrazët. Punojmë sistematikisht, me dinamikë dhe pa improvizime.
Nga këto 288 projekte: 193 janë plotësisht të përfunduara, 26 janë në fazë përfundimtare, 89 po realizohen aktivisht, ndërsa për 6 projekte të tjera procedura e tenderimit ka përfunduar dhe realizimi i tyre fillon së shpejti.
Këto nuk janë vetëm shifra. Këto janë rrugë të reja, sheshe, rrjete ujësjellësi dhe kanalizimi, parqe të reja, sisteme fekale, objekte sportive, përmbajtje kulturore, shkolla të reja dhe kopshte të reja për fëmijë. Këto janë mbi 220 projekte kapitale në infrastrukturë, mbi 40 projekte në mjedisin jetësor, 7 në infrastrukturë sportive, 5 projekte në kulturë dhe mbi 10 investime të rëndësishme në arsim. Kjo do të thotë jetë më e mirë, shërbime më të mira, komunë më e mirë dhe shtet më i mirë.
Paralelisht, përmes thirrjes së dytë publike për financimin e komunave me kredinë hungareze, janë përfshirë 828 projekte të reja me vlerë totale prej 13,8 miliardë denarësh, gjegjësisht mbi 225 milionë euro. Edhe këtu tashmë shohim dinamikë të fortë – mbi 50 projekte janë përfunduar ose janë në fazën finale, ndërsa për mbi 500 projekte janë nënshkruar kontrata për realizimin e tyre. Kjo do të thotë se shteti do të hyjë në cikël edhe më intensiv të investimeve. Më shumë makina, më shumë kantierë, më shumë projekte dhe më shumë rezultate konkrete për qytetarët.
Gjithë këtë e bëjmë në mënyrë transparente, moderne dhe përgjegjëse. Kjo Platformë tregon se mjetet publike janë nën mbikëqyrje publike, se institucionet punojnë me rregulla të qarta, se komunat kanë qasje të barabartë dhe se Qeveria funksionon me standarde bashkëkohore të llogaridhënies dhe digjitalizimit.
Qëllimi ynë nuk është vetëm të ndërtojmë — por të ndërtojmë me ndershmëri, dukshmëri dhe matshmëri. Qëllimi ynë nuk është vetëm të realizojmë projekte — por të vendosim një kulturë të re të qeverisjes ku çdo informacion është i qasshëm, çdo hap i dokumentuar dhe çdo premtim i verifikueshëm.
Sot, me këtë Platformë, e hapim fazën e ardhshme të pjekurisë institucionale. Faza në të cilën shteti nuk mbrohet me fjalë, por me të dhëna. Nuk arsyetohet me justifikime, por me rezultate. Faza në të cilën qytetarët janë kontrollorë të vërtetë të resurseve publike.
Ju faleminderit që jeni pjesë e këtij procesi. Ju faleminderit që kërkoni, verifikoni dhe prisni nga ne më të mirën. Dhe mund të them se kjo Qeveri do të vazhdojë të punojë në këtë mënyrë. Të hapur. Përgjegjshëm. Dhe në interes të çdo qytetari të Maqedonisë
