Kryeministri Hristian Mickoski la të hapur mundësinë e zgjedhjeve të parakohshme, duke paralajmëruar se opozita socialdemokrate mund ta ketë të realizuar kërkesën e saj, nëse vazhdon të insistojë për një skenar të tillë.
Deklarata e Mickoskit vjen pasi Lidhja Social Demokrate e Maqedonisë (LSDM) ka vlerësuar se viti 2026 do të jetë i vështirë ekonomikisht për qytetarët e Maqedonisë së Veriut, duke akuzuar Qeverinë për mungesë të mjeteve buxhetore për rritje pagash, ulje të çmimeve dhe realizim të premtimit për pagë minimale prej 600 eurosh.
“Tashmë mungojnë rreth 1 miliard euro në buxhet. Gjithçka është shtrenjtuar, ndërsa shtrenjtimi i energjisë elektrike do të sjellë rritje zinxhir të çmimeve. Qeveria deri në zgjedhje do të përpiqet t’i mashtrojë qytetarët me manipulime”, thuhet në reagimin e LSDM-së, e cila paralajmëron se pas zgjedhjeve problemet ekonomike do të dalin në pah edhe më thellë.
Duke iu përgjigjur këtyre kritikave, Mickoski theksoi se retorika për zgjedhje të parakohshme duhet të peshohet me kujdes.
“Nuk kam dëgjuar zyrtarisht kërkesë për zgjedhje të parakohshme, por njeriu duhet të ketë kujdes se çfarë dëshiron, sepse ndonjëherë dëshira mund t’i plotësohet”, deklaroi kryeministri.
Ai shtoi se Qeveria pret vazhdim të trendit të uljes së inflacionit, duke vlerësuar se gjatë vitit të ardhshëm ai do të lëvizë ndërmjet 2 dhe 3 për qind, nivel që sipas tij do të jetë më i ulët se rritja e Bruto Prodhimit Vendor.
Përplasjet mes pushtetit dhe opozitës rreth çmimeve, inflacionit, standardit jetësor dhe rritjes së pagave janë bërë pjesë e debatit të përditshëm politik, ndërsa paralajmërimet për zgjedhje të parakohshme po rikthehen si një nga temat kryesore në skenën politike të vendit
