Për Maqedoninë, Plani për Rritje është shumë më tepër se një nismë, theksoi kryeministri Hristijan Mickoski në Samitin e liderëve të Ballkanit Perëndimor për Planin e Rritjes në Tiranë. Kjo është një histori për shndërrimin e angazhimeve në ndryshim të vërtetë, vazhdoi Mickoski, duke theksuar se Maqedonia ishte vendi i parë në rajon që e operacionalizoi Instrumentin për Reforma dhe Rritje dhe i pari që mori parafinancim sipas Planit.
Kjo ishte rezultat i një pune të përkushtuar dhe një besimi të palëkundur në vlerat evropiane. Agjenda jonë reformuese, e miratuar nga Komisioni Evropian, përqendrohet në atë që është me të vërtetë e rëndësishme – qeverisje e mirë, energji e pastër, arsim, zhvillim i biznesit dhe sundimi i ligjit. Këto nuk janë qëllime abstrakte. Ato janë themelet e një shteti modern evropian, realiteti i përditshëm që duam t’ua sigurojmë qytetarëve tanë, theksoi Mickoski.
Në fjalën e tij, Mickoski renditi disa nga ndryshimet që tashmë janë duke u zbatuar.
Këtë vit kemi dorëzuar dy kërkesa për pagesë të fondeve, me të cilat mbështeten reformat prioritare të Qeverisë – veçanërisht në fushën e shërbimeve digjitale, forcimin e klimës së biznesit dhe përmirësimin e efikasitetit energjetik. Deri tani janë paguar rreth 24 milionë euro, kombinim i kredive dhe granteve investuese.
Ne vazhdojmë me hapa të mëtejshëm reformues në të gjitha sektorët: menaxhimi i financave publike, transformimi digjital, zhvillimi i biznesit dhe reformat në gjyqësor. Përfundimi i këtyre hapave do të zhbllokojë mbështetje shtesë nga BE në vlerë prej mbi 134 milionë euro.
Por këto nuk janë vetëm shifra, këto janë histori ndryshimi, shtoi Mickoski, duke theksuar anëtarësimin e Maqedonisë në Zonën e Vetme Evropiane të Pagesave (SEPA) ndër partnerët e parë të Ballkanit Perëndimor të integruar në këtë sistem evropian, pastaj projektin WiFi për Ballkanin Perëndimor (WiFi4WB), i cili po zbatohet në 63 komuna, Samitin Digjital në Shkup si dëshmi e angazhimit për interoperabilitet, identitet digjital të sigurt dhe harmonizim më të afërt me standardet digjitale evropiane, si dhe programin Horizon—këtu po ndërtojmë një Antenë Kombëtare të Fabrikës së Inteligjencës Artificiale që e lidh Maqedoninë me ekosistemin evropian të IA dhe me kapacitetet e superkompjuterëve.
Mickoski foli edhe për lidhshmërinë si prioritet i lartë, duke përmendur modernizimin e tre pikave kufitare – Deve Bair, Bllacë dhe Bogorodicë – në kuadër të iniciativës Rripat e Gjelbër, me ç’rast Evropa bëhet fizikisht më e afërt për qytetarët.
“Tranzicioni ynë i gjelbër, nga konviktet studentore me efikasitet energjetik deri te investimet e reja në transport dhe infrastrukturë hekurudhore, tregon se rritja dhe qëndrueshmëria mund të ecin dorë për dore. Në total, projekte me vlerë rreth 1,1 miliardë euro janë në kuadër të Planit për Rritje, nga të cilat mbi gjysmë miliard janë grante të BE-së,” theksoi Mickoski, i cili foli edhe për bashkëpunimin e thelluar rajonal përmes Tregut të Përbashkët Rajonal dhe Procesit të Berlinit, me të cilët po krijohet një hapësirë që pasqyron Tregun e Vetëm Evropian.
Këto hapa janë dëshmi se kur i integrojmë tregjet tona, kur i lidhim rrugët dhe kur i harmonizojmë rregullat, ne tashmë po e praktikojmë Bashkimin Evropian dhe vlerat e tij, përfundoi Mickoski.
“Mesazhi ynë sot është i thjeshtë, por i fortë: Maqedonia po përmbush. Ne nuk reformojmë sepse pritet prej nesh, por reformojmë sepse besojmë në idenë evropiane. Ne po e ndërtojmë Evropën në shtëpi me politikat tona, me veprat tona dhe me vlerat tona.
Tani presim të njëjtën gjë nga partnerët tanë – një qasje të drejtë, meritokratike që shpërblen rezultatet dhe njeh përkushtimin. Së bashku ta shndërrojmë këtë Plan për Rritje në përparim dhe ndryshim të vërtetë; ta bëjmë dëshmi se ideja evropiane vazhdon të frymëzojë, të bashkojë dhe të japë rezultate, jo nesër, por sot,” përfundoi kryeministri Hristijan Mickoski në Samitin e liderëve të Ballkanit Perëndimor për Planin për Rritje në Tiranë.
