Së pari dua të them se sot opinioni ishte dëshmitar i një qasjeje ndryshe në zgjidhjen e çështjeve të hapura, diçka që ndoshta nuk ka ndodhur gjatë 35 viteve të fundit të shtetësisë dhe kjo përmes, do të thosha, një diskutimi frytdhënës në kuadër të këtij takimi të liderëve dhe një debati për të cilin duhet të them se në një masë të caktuar ishte i mbushur me propozime dhe ide. U hapën një pjesë e madhe e çështjeve të hapura; për shumicën e tyre kemi të njëjtin mendim, kemi gjuhë të përbashkët, ndërsa për disa normalisht qëndrimet tona dallojnë, por ajo që për mua është e rëndësishme është se përmes një diskutimi të tillë, në të cilin të gjithë aktorët e këtij takimi të liderëve që ishin të pranishëm deklaruan publikisht para jush gazetarëve dhe opinionit maqedonas se takimi ishte konstruktiv, për mua si organizator dhe Kryeministër i Qeverisë është vërtet kënaqësi, sepse opinioni maqedonas, qytetarët maqedonas, në këtë periudhë festash, patën mundësi të shohin një sjellje ndryshe nga aktorët politikë – një pjekuri, sjellje konstruktive, që nënkupton tejkalimin e problemeve e jo krijimin e problemeve.
Propozova që takime të tilla të mbahen më shpesh, por njëkohësisht propozova dhe kjo u pranua nga përfaqësuesit e tjerë të takimit të sotëm të liderëve, që debati për disa çështje për të cilat sot biseduam të vazhdojë në kuadër të Kuvendit, në nivel të koordinatorëve të grupeve parlamentare, jam i bindur se për të gjitha këto çështje të hapura për të cilat kërkohet urgjencë, në ditët në vijim do të gjendet zgjidhje dhe ato do të tejkalohen.
Ajo që për mua për momentin paraqet një çështje akute dhe për të cilën duhet të gjendet zgjidhje sa më shpejt dhe mendoj se sot në këtë takim arritëm të gjejmë një lloj kompromisi, është Ligji për kundërvajtjet, që “Safe City” apo “Qyteti i Sigurt” të mund të fillojë të funksionojë nga 1 shkurti i këtij viti, ashtu siç është planifikuar, me miratimin e këtij ligji, i cili do ta përsëris, është ligj me shumicë dy të tretat; për të nuk nevojitet shumicë e Badenterit, por shumicë dy të tretat.
Mendoj se të gjithë përfaqësuesit sot u pajtuam për qeverinë teknike. Të gjithë të pranishmit sot u pajtuam; pati një sugjerim nga njëri prej të pranishmëve që të bëhen konsultime me bashkësinë ndërkombëtare, por në përgjithësi të gjithë u pajtuam se qeveria teknike duhet t’i përkasë së kaluarës. Mendoj se duhet të tregojmë përgjegjësi edhe para bashkësisë ndërkombëtare se vetë mund të marrim vendime të pjekura, kështu që për mua kjo është një vendim i pjekur dhe mendoj se qeveria teknike duhet të mbetet në të kaluarën, megjithatë, nuk është as karakteri im personal e as mënyra ime e të menduarit që kjo të mos jetë një vendim konsensual brenda grupeve parlamentare, vendim që do të miratohet.
Sot patë se një koalicion, do të thosha, mungonte, prandaj, nëse ai koalicion nuk e pranon miratimin e ndryshimeve në Ligjin për Qeverinë, me të cilat do të fshihej qeveria teknike për zgjedhjet e ardhshme parlamentare. E dini se ky ligj ndryshohet me shumicë të thjeshtë në Parlament, me 61 vota pro, megjithatë propozimi im ishte që të mos e bëjmë këtë me forcë pa pëlqimin e tyre, por të miratojmë ndryshime në ligj sipas të cilave, pas zgjedhjeve të ardhshme, atyre që do të pasojnë më vonë, të mos vlejë më qeveria teknike, ja le të vlejë për këto zgjedhje nëse ata kaq shumë insistojnë që për këto zgjedhje të ketë qeveri teknike, ja ndryshimet që do t’i miratonim të mos i përfshijnë zgjedhjet e ardhshme parlamentare, por disa të tjera që do të pasojnë më vonë, por njëkohësisht duhet patjetër të bëjmë disa ndryshime në Ligjin për Qeverinë, pse? Sepse tani kemi ndryshim të resorëve. Për shembull, Ministria e Shoqërisë Informatike dhe Administratës, ish-MShIA, tani është ndarë në dy ministri: Administratë Publik
Pra, ne jemi të gatshëm, nëse nuk ka pajtim mes të gjitha grupeve parlamentare brenda Parlamentit që për zgjedhjet e ardhshme të fshihet qeveria teknike, të paktën për ato pasuese dhe që të mos përsëritet më kurrë. Do të rikujtoj se gjatë Marrëveshjes së Przhinos, mandati i qeverisë teknike kishte afat të kufizuar dhe kjo duhej të vlente vetëm për ato zgjedhje. Ne tani, nga njëra anë, planifikojmë të jemi pjesë e familjes evropiane, ndërsa nga ana tjetër kërkojmë qeveri teknike. Mendoj se për mua disa gjëra janë vërtet të ngatërruara, por çfarë të bëjmë – vetëm që të dalim nga ky ngërç, ne e pranojmë edhe këtë kompromis. Nëse opozitarja LSDM mendon se për zgjedhjet e ardhshme nevojitet qeveri teknike, në rregull, le të jetë për këto, por të paktën pas tyre, kushdo që të fitojë në zgjedhjet e ardhshme, të mos ketë më qeveri teknike.
Folëm edhe për zgjedhjen e Avokatit të Popullit, mendoj se këtu do të kërkojmë disa zgjidhje kreative që duhet të ndodhin këto ditë. Folëm edhe për Kodin Zgjedhor, numrin e njësive zgjedhore, mënyrën e votimit të diasporës, në pjesën e çështjeve ekonomike u hapën gjithashtu disa tema. Prandaj e vlerësoj këtë takim si një mënyrë dhe qasje të re për zgjidhjen e problemeve, e jo për gjenerimin e problemeve.
Pres propozime nga opozita, të cilat në të ardhmen edhe shumica qeverisëse do t’i mbështesë, propozime që do të sjellin vlerë të shtuar në cilësinë e jetës së qytetarëve. Duhet të piqemi gjatë procesit dhe unë jam vërtet i kënaqur, si njeri që e organizoi këtë sot, si Kryetar i Qeverisë, që pas 35 vitesh patëm një takim liderësh në të cilin u ofruan zgjidhje, e nuk u gjeneruan konflikte.
