Sot kam nderin t’ju drejtohem me rastin e themelimit të Qendrës për Resurse – një mjet strategjik me të cilin e forcojmë zbatimin e Strategjisë Nacionale Zhvillimore, në partneritet me Programin e Kombeve të Bashkuara për Zhvillim dhe me mbështetjen e Qeverisë së Republikës së Maqedonisë.
Kjo qendër nuk është vetëm një strukturë e re institucionale. Ajo është dëshmi e qartë se Maqedonia po e ndërton ardhmërinë e saj mbi themelet e menaxhimit modern, transparencës dhe efikasitetit. Projekti synon të adresojë sfidat e thella sistemike – përmes menaxhimit të përmirësuar, kapaciteteve të avancuara institucionale dhe zhvillimit të një infrastrukture të qëndrueshme. Këto nuk janë reforma teknike, ky është vizioni i një shteti që synon të jetë modern, funksional dhe i orientuar drejt rezultateve.
Qeverisja e mirë është më shumë se funksionalitet administrativ. Ajo nënkupton institucione që punojnë me integritet, me koordinim, me llogaridhënie – si në nivel kombëtar, ashtu edhe në nivel lokal. Ndërsa pikërisht në këtë kuadër, decentralizimi është një nga shtyllat më të rëndësishme.
Sepse komuna të forta dhe funksionale nënkuptojnë shtet të fortë. Kur vetëqeverisja lokale ka njohuri, kapacitete dhe resurse, ajo është më afër qytetarëve. Ajo mund t’i ndiejë më shpejt dhe më saktë nevojat e tyre, të ofrojë zgjidhje dhe të krijojë komunitete që përparojnë.
Edhe pse dy dekadat e fundit kemi investuar përpjekje të rëndësishme në zhvillimin e decentralizimit, duhet të pranojmë sinqerisht: rezultatet ende nuk janë në nivelin që qytetarët e meritojnë. Veçanërisht në pjesën e shërbimeve cilësore publike, menaxhimin me resurset, si dhe në krijimin e kushteve për zhvillim ekonomik lokal. Autoritetet lokale janë përgjegjëse për shumë politika kyçe që prekin çdo ditë jetën e qytetarëve – dhe pikërisht për këtë arsye ato duhet të jenë të forta, profesionale dhe efikase.
Qendra për Resurse është përgjigjja jonë e përbashkët ndaj këtyre sfidave reale. Qeveria, përmes Ministrisë së Vetëqeverisjes Lokale, krijon mekanizëm me të cilin komunat fitojnë mbështetje strategjike, ekspertizë dhe instrumente për zbatimin më të mirë të decentralizimit dhe zhvillimit të balancuar rajonal.
Fuqizimi i komunave nuk është shpenzim – është investim. Investim në jetë më të mirë, në zhvillim të qëndrueshëm, në stabilitetin e komuniteteve lokale dhe në një shtet funksional që e di në cilin drejtim po shkon dhe çfarë po ndërton.
Vetëm me komuna të fuqishme mund ta ndërtojmë Maqedoninë që jo vetëm i ndjek standardet evropiane – por i jeton ato.
Prandaj, dua të përcjell një mesazh të qartë për çdo kryetar komune, pa marrë parasysh nëse udhëheq një komunë të madhe urbane apo një komunitet të vogël rural: shqyrtoni mundësitë që i ofron Qendra për Resurse, përdorni mbështetjen, kërkoni ndihmë profesionale aty ku ka sfida ose mungesë të kapaciteteve. Kjo nuk është dobësi – kjo është mençuri në menaxhimin.
Të nderuar,
Me këtë nismë krijojmë mjete, struktura dhe njohuri që do ta transformojnë vendin tonë në një shtet modern, funksional dhe përgjegjës. Ky është detyrimi që marrim para qytetarëve – dhe kjo është fryma reformuese që e lëvizë Maqedoninë përpara.
Më lejoni në fund të shpreh urimet e sinqerta për Ministrinë e Vetëqeverisjes Lokale, ministrin Perinski, si dhe për të gjithë partnerët, Ambasadën Zvicerane, UNDP dhe komunitetin ndërkombëtar që kontribuojnë aktivisht në këtë proces të rëndësishëm.
Së bashku ndërtojmë institucione më të fuqishme. Së bashku ndërtojmë komuna më të fuqishme. Së bashku ndërtojmë një Maqedoni më të fuqishme.
