Është nder dhe privilegj t’ju drejtohem sot, në shënimin e 25-vjetorit jubilar të institucionit që është shtylla kryesore e shëndetësisë sonë publike – FSSH-ja. FSSH-ja është një institucion i cili nuk është vetëm administrator i fondeve, por partner, ndërtues, ruajtës i stabilitetit dhe nxitës i reformave.
Por duhet të jemi të sinqertë: ky institucion në të kaluarën kishte një kredibilitet seriozisht të lëkundur. Qytetarët shihnin drejtorë me para, shpenzime të pakalkuluara, vendime jotransparente dhe një sistem që më shumë i ngjante një fushe për privilegje personale sesa një shërbim për qytetarët. Kjo krijoi mosbesim, dyshim dhe zhgënjim. Por sot kjo është ndryshe. Sot FSSH-ja funksionon me rregulla të qarta, mekanizma të fortë të kontrollit, me menaxhim transparent dhe me procedura të rishikuara. Sot FSSH-ja është një institucion që e ka kthyer integritetin e tij në mënyrën e vetme të mundshme – me punë, me rregull, me disiplinë dhe me përgjegjësi të qartë. Dhe duhet të them se Sasho Klekovski ka bërë një punë të shkëlqyer.
Kur e morëm përgjegjësinë për shtetin, gjetëm një sistem shëndetësor në degradim të plotë: me mungesë të kuadrit, me institucione jofunksionale, pajisje të pamjaftueshme, lista të gjata pritjeje dhe besim seriozisht të dëmtuar te pacientët. Në vend që kjo të ishte një justifikim, ne e shndërruam atë në motiv. Gjatë një viti e gjysmë që kanë kaluar, Qeveria e Republikës së Maqedonisë tregoi se çfarë do të thotë përkushtim i vërtetë ndaj shëndetësisë publike. Që në ditën e parë filluam me një qëllim të qartë: ta rindërtojmë, modernizojmë dhe humanizojmë sistemin shëndetësor.
Në infrastrukturë kemi nisur një valë të re investimesh: nga ambulanca e re në Petrovec, deri te rindërtimi dhe modernizimi i sallave operative në SPQ “8 Shtatori”, si dhe një sërë rindërtimesh dhe rinovime teknologjike në spitalet mbarë vendit. Këto nuk janë vetëm ndërtime – këto janë shtëpi të shëndetit, vende ku çdo qytetar ka të drejtë për trajtim dinjitoz dhe bashkëkohor.
Por objektet pa punonjës shëndetësorë janë vetëm objekte të zbrazëta. Prandaj e udhëheqim politikën më të fortë kadrovike në dekadën e fundit. Në periudhën e kaluar, 1.500 punëtorë me kontratë patën mundësinë të kalojnë në vende të sigurta pune. Kemi 600 specializantë të rinj, nga të cilët 300 tashmë janë të punësuar. Dhe nënshkruam marrëveshje afatgjate për rritjen e pagave në shëndetësinë publike çdo vit deri në vitin 2028. Kjo nuk është shpenzim – është investim në zemrën e shëndetësisë, te njerëzit.
Përveç kësaj, Qeveria ka siguruar buxhetin më të madh historik për FSSH-në deri më tani – 53 miliardë denarë. Kjo mundësoi një rritje prej 33% të kapitacionit për mjekët e përgjithshëm dhe gjinekologët, një rritje prej 23% për stomatologët, një rritje kumulative prej 17% të pagave në shëndetësinë publike, nga të cilat 9.5% janë rritje reale dhe një rritje prej 107% të kompensimit të kushtëzuar për barnat e reja inovative. Këto nuk janë numra në letër. Këto janë numra që ndryshojnë realitetin e pacientëve, të punonjësve shëndetësorë dhe të të gjithë sistemit.
Pjesë e vizionit tonë për shëndetësi moderne është edhe lufta pa kompromis kundër krimit dhe korrupsionit. Për herë të parë pamë akuza për abuzime të rënda në onkologji – fusha që mbetën të paprekura për vite me radhë. Po hetohet çdo abuzim, pa përjashtim dhe asnjë institucion ose pozicion nuk është i mbrojtur nëse e ka dëmtuar besimin e pacientëve. Aty ku bëhet fjalë për jetë njerëzish – duhet të ketë drejtësi.
Sot, 25 vjet pas themelimit të Fondit për Sigurim Shëndetësor, shohim një institucion që po hyn në një fazë të re. Tashmë po përgatiten projekte të reja, objekte të reja dhe standarde të reja që do ta ngrenë shëndetësinë në nivel evropian. Ky nuk është fundi, ky është fillimi i një kapitulli të ri.
Të nderuar, ju përgëzoj për këtë jubile. Ju falënderoj për punën, përkushtimin, për të gjitha heroizmat e heshtura që nuk shihen, por që i ndjejmë çdo ditë. Të vazhdojmë së bashku – me të njëjtin besim, të njëjtën disiplinë dhe të njëjtin qëllim: të ndërtojmë një sistem të shëndetshëm, stabil dhe modern i cili do të mbrojë çdo qytetar tonin.
