Sot po lëshojmë në përdorim një pjesë të re të autostradës Kërçovë–Ohër. Kjo nuk është vetëm një rrugë tjetër, kjo është një dëshmi e fortë se Maqedonia po ecën përpara, se po ndërtohet dhe se po tejkalohen vitet e gjata të ngecjes.
Pothuajse një dekadë ky projekt ishte simbol i gjërave të bllokuara dhe të papërfunduara. Qytetarët me të drejtë ishin të zhgënjyer, shihnin kantierë që qëndrojnë në vend, e jo rrugë që përdoren. Dhe për fat të keq, për shkak të asaj pamjeje, shumë nga bashkëqytetarët tanë e lanë jetën e tyre këtu.
Sot e ndryshojmë atë pamje. Sot tregojmë se aty ku kishte ngecje – ka zgjidhje, aty ku kishte mosbesim – ka rezultate.
Autostrada Kërçovë–Ohër ka rëndësi strategjike për vendin tonë. Ajo është arteria kryesore që lidh jugperëndimin e Maqedonisë me pjesën tjetër të shtetit dhe me Ohërin – një qytet që nuk është vetëm perla jonë turistike, por edhe trashëgimi kulturore botërore. Me këtë autostradë, Ohri dhe i gjithë rajoni fitojnë energji të re për zhvillim, shanse të reja për turizmin dhe perspektivë të re për ekonominë.
Me udhëtim më të shpejtë, më të lehtë dhe më të sigurt, kjo autostradë do të sjellë më shumë turistë, më shumë investime dhe më shumë mundësi për ekonominë lokale.
Do të shkurtohet koha e udhëtimit, do të lehtësohet transporti i mallrave dhe shërbimeve dhe do të hapet hapësirë për biznese të reja dhe vende të reja pune.
Kjo Qeveri nuk e humb kohën me justifikime, por punon. Ja, kjo autostradë po bëhet realitet. Por kjo nuk është e vetmja vepër.
Brenda vetëm një viti e gjysmë kemi vënë në përdorim:
• Aksin Gradsko–Farish prej 25,7 kilometrash;
• Aksin Stracin–Kriva Pallankë prej 25,5 kilometrash;
• Aksin Vërbjan–Botun prej rreth 20 kilometrash.
Janë gjithsej 70 kilometra rrugë të reja. Me këtë pjesë nga Kërçovë–Ohër, nesër numri do të arrijë 87,5 kilometra. Dhe kjo për diçka më pak se një vit e gjysmë.
Ky është muaji i 15-të që kur kjo Qeveri është zgjedhur. Këto nuk janë fjalë, këto janë vepra.
Jam i vetëdijshëm se opozita do të shpikë shumë të pavërteta, shumë gënjeshtra, do të përpiqen të sajojnë shumë gjëra me të cilat mendojnë se do t’i bëjnë dëm kësaj Qeverie, por ne nuk kemi nevojë të përgjigjemi në një politikë të tillë të mendimeve të errëta dhe politikë që e shtynte Maqedoninë prapa. Ne do të punojmë, do të ndërtojmë, ndryshe nga ata që ishin qeveri e LSDM-së dhe BDI-së, të cilët për shtatë vite nuk bënë asgjë dhe vetëm vidhnin.
Ky është dallimi thelbësor mes njërës dhe tjetrës Qeveri.
Gjithashtu, në fund, më lejoni të përmend disa parametra të tjerë të rëndësishëm ekonomikë.
I pari është fakti se në tremujorin e dytë ekonomia jonë shënoi rritje reale prej 3,4% dhe jemi në pesë vendet e para në Evropë për nga shkalla e rritjes së produktit të brendshëm bruto.
Nëse në tremujorin e parë ishim në vendin e katërt, tani e ndajmë vendin e tretë me Kroacinë. Para nesh janë Irlanda dhe Qiproja me 3,6%.
Gjithashtu, më lejoni t’ju informoj se masat e qeverisë dhe puna aktive që kemi bërë gjatë kësaj periudhe kanë gjeneruar 10.000 vende të reja pune, pra, nëse krahasojmë numrin e të punësuarve në tremujorin e dytë të vitit 2024 – pak më shumë se 691 mijë – me numrin e të punësuarve në tremujorin e dytë të vitit 2025 – pak më shumë se 701 mijë – kjo do të thotë se kemi krijuar për një vit 10 mijë vende të reja pune, kemi ulur numrin për mbi 7 mijë të papunë kur krahasohen këto dy tremujorë. Ndoshta këto shifra duken vetëm numra në letër, por ato janë pjesë e jetës reale, janë familje, janë njerëz, janë të vërteta.
Kjo Qeveri ka për qëllim ta bëjë jetën e qytetarëve tanë më të mirë dhe më të suksesshme.
Parametri i tretë që gjithashtu dua të theksoj është fakti se shtatë muajt e kaluar të këtij viti, nga janari deri në korrik, eksporti po rritet më shpejt se importi. Dhe ky është një shembull i rrallë nëse e shikojmë ekonominë maqedonase në vitet e kaluara, kur për një periudhë kaq të gjatë kemi orientim më të madh të shtetit drejt eksportit sesa importit. Kjo do të thotë se po ulet deficiti tregtar, që do të thotë se më shumë valutë, më shumë para mbeten në ekonominë maqedonase dhe në duart e qytetarëve maqedonas, gjë që është edhe qëllimi ynë si Qeveri. E di që rezultate të menjëhershme janë të pamundura, këtë e thamë edhe në fushatë, ne nuk jemi mrekullibërës. Mrekullitë janë të pamundura, por premtuam punë shumë të përkushtuar, të ndershme dhe kjo është ajo që kemi bërë gjatë këtyre 15 muajve.
Punë shumë të përkushtuar dhe të ndershme dhe unë ju jap fjalën që kështu do të vazhdojmë, të luftojmë çdo ditë, të luftojmë për çdo projekt të ri, për çdo investim të ri, për çdo fat njerëzor që ta ndihmojmë dhe ta bëjmë jetën më të denjë.
Të nderuar të pranishëm,
Ky është vizioni ynë, Maqedoni me vepra, jo me justifikime. Kjo është dëshmi se mund ta lëmë pas periudhën e ngecjes dhe ta hapim rrugën drejt zhvillimit.
Do të vazhdojmë kështu, të ndërtojmë, të përfundojmë gjërat e nisura dhe të krijojmë perspektiva të reja për çdo rajon dhe për çdo qytetar.
Qoftë me fat dhe për shumë vite të përdoret.
Të jeni shëndoshë e mirë.
Zoti e bekoftë Maqedoninë.
