Kryetari i Qeverisë, Hristijan Mickoski, në intervistën “Tema e Ditës” në Sitel, duke folur për rastin me Artan Grubin dhe reagimet e opinionit, theksoi se e kupton pakënaqësinë e qytetarëve dhe se i mbështet ata, ndërsa lidhur me sulmet nga opozita për një marrëveshje të mundshme, pyeti përse të merrej vesh me dikë që e ka sulmuar ashpër.
“Po e ndjek debatin që po zhvillohet këto 2-3 ditë rreth rastit Grubi dhe përafërsisht, ajo që mund të dëgjoj dhe lexoj në rrjetet sociale, por edhe mesazhet që më kanë arritur, është kjo, kemi qytetarë me të drejtë të revoltuar, të cilët në memorien e tyre kolektive ende i kanë ato pamje nga e kaluara kur porositeshin procese gjyqësore, njerëzit futeshin në paraburgim e pastaj nxirreshin sipas nevojës, ju kujtohet për ndryshimet kushtetuese se si njerëz liroheshin brenda natës që të hyjnë në Parlament dhe të votojnë. Nuk do t’i komentoj të gjitha incizimet që dolën në opinion ku funksionarë të lartë të qeverisë së kaluar porosisnin procese gjyqësore në Gjykatën Supreme dhe në gjykata të tjera, kështu që absolutisht i kuptoj qytetarët dhe i mbështes”, thotë kryeministri Mickoski.
Kryeministri shtoi se grupi i dytë janë ata “proxy komentues” të opozitës që përpiqen të hipin mbi revoltën e arsyeshme të qytetarëve, ta përforcojnë dhe ta shfrytëzojnë, gjë që, sipas tij, nuk mund të arsyetohet.
“Më së shpeshti ata akuzojnë me tezën se ekziston një marrëveshje mes qeverisë dhe Grubit. Tani ta analizojmë në mënyrë objektive, sepse një gjë është politika dhe tjetër është realiteti. Fillimisht, ju kujtohet se bënin fushatë kinse qeveria e ka lënë Grubin të arratisej, pastaj, kur ai u paraqit në pikën kufitare Bllacë, bënin fushatë se qeveria po e shpëton BDI-në, për të arritur në përfundim se kur prokuroria dhe gjykata caktuan masën e arrestit shtëpiak, të thonë se kjo është me urdhër të paktit që qeveria paska lidhur me Grubin. Unë kam qenë i vetmi që personalisht nga Grubi jam sulmuar më së shumti në të kaluarën, unë jam i vetmi që nga zyrtarë të lartë të BDI-së, si në të kaluarën ashtu edhe sot, jam sulmuar personalisht me pasione të ulëta, me gënjeshtra dhe konstruksione, në mënyrën më të drejtpërdrejtë, më brutale, cila është logjika që unë të lidh pakte me persona si Artan Grubi dhe të ngjashmit, që ata të marrin masa më të lehta sigurie”, deklaroi kryeministri Mickoski.
Njëkohësisht, kryeministri Mickoski pyeti nëse te ky grup personash pas profileve të rreme dhe strukturash “proxy” të LSDM-së ndoshta “punon Frojdi”, përkatësisht nëse nënvetëdija bën që atë që ata e kanë bërë në të kaluarën ta mendojnë se po e bën kjo qeveri tani.
Sa i përket vendimit të prokurorisë dhe gjykatës, kryeministri Mickoski theksoi se shumë herë deri më tani i ka komentuar si prokurorinë ashtu edhe gjyqësorin dhe se qëndrimi i tij për to mbetet i pandryshuar, ndërsa ajo që ka thënë se do ta pranojë pa dallim nëse pajtohet apo jo, janë vendimet e Gjykatës Kushtetuese.
