Kryeministri Hristijan Mickoski, duke iu përgjigjur pyetjeve të gazetarëve, u ndal te tema e blerjes së duhanit. Ai theksoi se çmimi i blerjes është më i larti deri më tani dhe për këtë arsye si blerësit ashtu edhe prodhuesit e duhanit janë të kënaqur.
“Për momentin janë blerë 23–24 milionë kilogramë duhan dhe çmimi mesatar është afër 420 denarë, diku rreth 7 euro, që është më i larti deri më tani. Siç e shihni, nuk ka protesta, nuk ka bllokada, nuk ka asgjë të tillë, përkundrazi, janë të kënaqur si prodhuesit e duhanit ashtu edhe blerësit. Kur kësaj t’i shtohet edhe subvencioni, atëherë arrijmë në rreth 500 denarë për kilogram duhan të dorëzuar. Për mua ky është një prodhim jashtëzakonisht cilësor dhe do të thosha një biznes jashtëzakonisht cilësor. Për 24 milionë kilogramë, kur i shumëzojmë me 500 denarë, marrim rreth 12 miliardë denarë, pra rreth 200 milionë euro që do të përfundojnë te prodhuesit e duhanit. Dhe kjo është mirë. Më parë bliheshin 15–16 milionë kilogramë me çmim 120–130 denarë, ndërsa sot janë 23–24 milionë kilogramë me çmim 420 denarë për kilogram, me subvencion 500. Vërtet po bëhet një punë e mirë”, deklaroi kryeministri Mickoski.
