Kandidati për kryetar komune të Çairit nga koalicioni VLEN, z. Izet Mexhiti, ka ndarë sot lajmin e rëndësishëm për ndërtimin e xhamisë më të madhe në Maqedoni, punimet për të cilën po zhvillohen me dinamikë të lartë në lagjen Fushë Tophanë të Çairit. Sipas Mexhitit, kjo vepër madhështore pritet të përfundojë në shkurt të vitit 2026, pak para muajit të shenjtë të Ramazanit, duke ofruar një hapësirë të denjë për mijëra besimtarë.
Ai në postimin e publikuar në faqen e tij zyrtare në Facebook, ka shpalor edhe detajet mbi këtë xhami, e cila do të ketë kapacitet për mbi 3000 besimtarë, me 1500 m² hapësirë të brendshme dhe 1500 m² hapësirë të jashtme, duke u bërë një qendër moderne të faljes, komunitetit dhe edukimit shpirtëror. Objekti në fjalë përfshin edhe:
-Një amfiteatër bashkëkohor për aktivitete kulturore e fetare,
-24 zyra funksionale për nevojat e xhamisë dhe komunitetit,
-Parkim nëntokësor, që ofron kushte të përshtatshme për besimtarët dhe vizitorët.
Izet Mexhiti e cilësoi këtë projekt si një vlerë të përjetshme për brezat e ardhshëm, që do ta zbukurojë jo vetëm Çairin, por edhe tërë Shkupin.
“Kjo xhami madhështore do ta zbukurojë Çairin dhe Shkupin, duke mbetur një vlerë e përjetshme për brezat e ardhshëm” – ka shkruar mes tjerash Mexhiti në faqen e tij zyrtare në rrjetin social Facebook.
