Pas largimit të Arben Taravarit nga Qeveria ka reaguar zëvendëskryeministri i parë i RMV-së, Izet Mexhiti. Përmes një statusi në Facebook, ai ka theksuar se procesi i ndryshimit nuk varet nga një individ i vetëm dhe se VLEN do të vazhdojë rrugën që ka nisur me mbështetjen e qytetarëve.
“VLEN nuk është ndërtuar mbi emra, por mbi vlera dhe mbi besimin e qytetarëve që duan një të ardhme ndryshe,” deklaroi Mexhiti. Ai ftoi të gjithë ata që ndihen të zhgënjyer nga ndarja e fundit, të bashkohen sërish me rrugën e ndryshimit: “Busulla politike e ndryshimit është VLEN. Ejani me ne!”
Në vazhdim statusin e plotë:
– Ti nuk e solle ndryshimin. Ti e pengove ndryshimin.
– Ti nuk po kthehesh tek populli. Ti po kthehesh tek lista e zezë.
– Ti nuk po e braktis Qeverinë. Ti e tradhëtove Qeverinë.
– Ti nuk e përfaqëson frymën e anëtarësisë së ASh-së. Ti e mashtrove anëtarësinë e ASh-së.
– Ti nuk je heroi i kësaj historie. Ti je dëshpërimi i çdo shqiptari- intelektual apo i paarsimuar, punëtor ose afarist, burrë a grua- ti je zhgënjimi i secilit aktivist e simpatizant, i secilit shqiptar e shqiptare që e votoi dhe e mbështeti ndryshimin.
VLEN vazhdon rrugën e ndryshimit. I ftojmë dhe mirëpresim me bujari të gjithë aktivistët, simpatizantët dhe votuesit që ndjehen të mashtruar, të tradhëtuar dhe të lënë në mes të rrugës pa orientim.
Busulla politike e ndryshimit është VLEN. Ejani me ne!
