Me ndjenja nostalgjie dhe plot frymëzimi, kandidati i Vlen për kryetar të komunës së Çairit, Izet Mexhiti ka ndarë sot një moment të veçantë me qytetarët duke rikthyer në vëmendje këngën ikonike “Vetëm për ty” të grupit legjendar Telex.
“Vetëm për ty, mëngjesi agon. Vetëm për ty, hëna ndriçon”, me këto vargje, që dikur frymëzuan breza të tërë, sot identifikohet Çairi ynë, komuniteti ynë dhe fitorja që po ndërtojmë bashkë, tha Mexhiti i cili kishte edhe një takim miqësor me Shpend Ahmetin, një nga anëtarët e grupit Telex.
Ai vlerësoi këtë këngë si një monument artistik të një kohe të idealeve dhe shpresës, e cila edhe sot vazhdon të mbajë gjallë emocionet dhe idealet e një gjenerate që besonte në ndryshim dhe dinjitet.
“Muzika e tyre ishte më shumë se art, ishte zë i lirisë, i dinjitetit, i krenarisë kombëtare. Ishte dritë për ata që kërkonin shpresë”. Mexhiti më tej nënvizoi se Telex-i, si shumë grupe tjera të artit që ka nxjerrë Çairi, janë dëshmi e fuqisë kulturore të komunitetit, e shprehjes autentike dhe e shpirtit shqiptar që i qëndron kohës.
“Këngët e tyre nuk harrohen, sepse brenda tyre rrjedh një histori e madhe, një frymë që na bashkon edhe sot. Është shpirti tejkohor i qenies shqiptare”, shton ai.
