Zëvendëskryeministri i parë dhe kandidat i VLEN për kryetar të komunës së Çairit, Izet Mexhiti, sot ka realizuar takim me pensionistët e kësaj
komune, duke vënë në pah rëndësinë e jashtëzakonshme që ata kanë për
shoqërinë në vend.
“Kam kënaqësinë e veçantë të takohem me njerëzit që gjithë jetën ia kanë kushtuar ndërtimit të shoqërisë sonë. Ata meritojnë respektin dhe mbështetjen më të madhe”, u shpreh Mexhiti.
Ai konfirmoi se Qeveria, për më pak se një vit, ka arritur të rrisë pensionet me gjithsej 7.000 denarë, një hap i rëndësishëm drejt
përmirësimit të kushteve ekonomike të qytetarëve në moshë të shtyrë.
“Ky është një ndryshim i ndjeshëm dhe konkret në jetën e përditshme të
pensionistëve. Kjo politikë do të vazhdojë me hapa të tjerë për të siguruar një pleqëri të denjë për të gjithë”, tha Mexhiti.
Më tej, nënvizoi se përkrahja për pensionistët nuk duhet të jetë vetëm
financiare, por edhe sociale, ndërkohë që shtoi se komuna e Çairit do të investojë në krijimin e përmbajtjeve të reja, programeve sociale,
kulturore dhe rekreative, ku përfshinë ngjarje kulturore dhe sportive, udhëtime dhe programe educative si dhe aktivitete shoqërore për një jetë
më cilësore.
Komuna e Çairit do të jetë partnere e të gjitha shoqatave të pensionistëve, duke mbështetur çdo iniciativë që kontribuon në mirëqenien e tyre, ndërsa në bashkëpunim me Qeverinë, do të dizajnohen edhe programe të veçanta për parandalimin shëndetësor, duke përfshirë
edukime, kontrolle mjekësore falas dhe aktivitete për ruajtjen e shëndetit fizik dhe mendor të të moshuarve, theksoi më tej Mexhiti, duke nënvizuar edhe angazhimin për t’u ardhur në ndihmë pensionistëve në kushte të rënda sociale përmes ndihmës sistematike, pakove sociale si dhe përkujdesjes së vazhdueshme institucionale.
“Pensionistët janë krenaria, forca dhe mençuria jonë më e madhe. Është detyrë e jona t’u sigurojmë një pleqëri të denjë, të qetë dhe të
përmbushur. Ky është një premtim që si komunë e Çairit do ta përmbushim deri në fund”, përfundoi kështu Mexhiti.
