Kandidati i koalicionit VLEN për kryetar të Komunës së Çairit, Izet
Mexhiti, ka zhvilluar një takim të veçantë me të rinjtë që për herë të
parë do të votojnë në zgjedhjet lokale të 19 tetor.
“Pata një takim shumë të veçantë me të rinjtë që për herë të parë do të
votojnë në këto zgjedhje. Rini plot energji, plot ëndrra e ide për të
ardhmen. Këta janë ata që do ta ndërtojnë të ardhmen e vendit, por është
detyra jonë t’ua hapim rrugën”, theksoi Mexhiti.
Ai nënvizoi se prioritet i programit të tij është krijimi i mundësive
për të rinjtë, nga arsimi modern e deri te mbështetja për inovacionin
dhe aktivitetet sportive.
Në këtë drejtim, Mexhiti rikujtoi projektet konkrete që tashmë janë në
proces, si ndërtimi i kampusit modern të Universitetit “Nënë Tereza”, me
kushte të denja për çdo student, në standardet e universiteteve
evropiane.
“Po punojmë që rinia të ketë hapësirë për të studiuar, për të krijuar
dhe për të zhvilluar idetë e saj. Po ndërtojmë kampusin modern të
Universitetit “Nënë Tereza”, me kushte të denja për çdo student, që të
rinjtë tanë të arsimohen dhe profesionalizohen në standardet e
universiteteve evropiane. Do të mbështesim start-up-et e të rinjve, do
të financojmë programe kulturore dhe inovative, ku rinia do të jetë
aktore dhe jo spektatore. Po ndërtojmë salla sportive, pishina dhe
hapësira për aktivitete rinore, sepse duam një brez të shëndetshëm,
aktiv dhe të përfshirë”, shtoi ai.
Mexhiti theksoi gjithashtu mbështetjen për klubet sportive lokale, me
synim që pasioni dhe talenti i të rinjve të kthehen në sukses e krenari.
Në fund të takimit, ai përsëriti mesazhin e tij:
“Kjo është rruga jonë: t’i japim rinisë vendin që meriton, sepse aty ku
rinia ka mundësi, aty fillon zhvillimi, aty lind fitorja”.
