Izet Mexhiti, kryetari i Komunës së Çairit dhe një nga drejtuesit e koalicionit VLEN, ka reaguar pas rezultateve të zgjedhjeve lokale, duke e cilësuar fitoren e koalicionit si “moment historik për shqiptarët në Maqedoninë e Veriut”.
Në një postim në rrjetet sociale, Mexhiti u shpreh se fitorja e VLEN-it është rezultat i besimit të qytetarëve në ndryshim dhe në një qasje të re politike.
“Sot fituan shqiptarët, fituan qytetarët që besuan në ndryshim. VLEN është fituesi i madh i zgjedhjeve lokale — kjo fitore legjitimon me votën e sovranit vullnetin tonë për rotacion politik dhe një të ardhme më të mirë,” shkroi Mexhiti.
Ai theksoi se kryetarët e rinj të zgjedhur do të nisin menjëherë punën me seriozitet dhe përkushtim:
“Vota juaj na nderoi, por edhe na obligon që të mos ndalemi me punë.”
Mexhiti shtoi se me këtë rezultat fillon “një erë e re politike për shqiptarët në Maqedoninë e Veriut”.
Koalicioni VLEN, sipas rezultateve paraprake, ka siguruar një numër të rëndësishëm komunash në këto zgjedhje, duke e pozicionuar veten si një faktor të rëndësishëm në skenën politike lokale.
