Sonte, në hapjen e shtabit zgjedhor në Dizhon 1, kandidati i VLEN-it për kryetar të komunës së Çairit, Izet Mexhiti tha se qytetarët tashmë kanë vendosur për ndryshimin dhe për një qeverisje të denjë.
“19 tetori do të jetë një ditë historike për Çairin, për Shkupin dhe për të gjithë shqiptarët. Fitorja jonë do të jetë madhështore, sepse është fitore e qytetarëve që kanë vendosur të ecin përpara me dinjitet dhe shpresë”, u shpreh Mexhiti para qytetarëve.
Ai theksoi se Çairi është rreshtuar fuqishëm përkrah tij: “Çdo lagje, çdo familje, çdo i ri dhe e re, çdo nënë e baba janë me ne, sepse e dinë se rruga jonë është e pastër dhe e ndershme, e vendosur për t’i sjellë Çairit qeverisjen që meriton”.
Duke folur për kundërshtarët politikë, Mexhiti tha se ata kanë humbur besimin e qytetarëve dhe janë kthyer në simbol të interesave personale dhe pazareve politike. “Ata nuk kanë vizion për të ardhmen, sepse janë të zhytur në të shkuarën. Qytetarët ua kanë kthyer shpinën”, tha ai.
Duke përmbyllur fjalën e tij para qytetarëve, Mexhiti tha se fitorja është e pashmangshme.
“Çdo ditë përkrahja për ne po rritet. Më 19 tetor do ta kurorëzojmë këtë betejë me një fitore të madhe, që do të hapë një epokë të re për Dizhonin 1 dhe për Çairin. Rrugëtimi ynë është i drejtë dhe fitorja jonë është e sigurt, sepse jemi një Zë”.
