Me rastin e fillimit të muajit të shenjtë të Ramazanit, kryetari i Komunës së Çairit, Izet Mexhiti, ka përcjellë një mesazh urimi për të gjithë besimtarët, duke theksuar rëndësinë e këtij muaji si kohë reflektimi, solidariteti dhe afrimi mes njerëzve.
“Nga sonte nis Ramazani, muaji i dritës, qetësisë, bashkimit dhe mëshirës. Është muaji që na kujton durimin, përkushtimin dhe dashurinë ndaj tjetrit. Na afron me familjen, me fqinjin dhe me këdo që ka nevojë për një fjalë të mirë,” u shpreh Mexhiti.
Ai theksoi se në Çair, në rrugët e Shkupit dhe në lagjet ku jehona e ezanit është pjesë e përditshmërisë, Ramazani ka ruajtur gjithmonë një ndjenjë të veçantë, duke krijuar një atmosferë që ndihet në çdo shtëpi dhe në çdo familje.
Një moment i veçantë i kësaj nate ishte edhe hapja e një xhamie të re në lagjen Fushë Topanë. Sipas kryetarit Mexhiti, kjo xhami do të shërbejë si një vend prehjeje shpirtërore për besimtarët, ku do të dëgjohen lutje, do të ndahen çaste qetësie e falënderimi dhe do të forcohen lidhjet mes njerëzve.
“Kjo xhami do ta forcojë edhe më shumë ndjenjën e bashkësisë që e ka mbajtur gjithmonë gjallë qytetin tonë. Le të jetë kjo natë një fillim i mbarë. Le të mbushet xhamia e re me lutje të sinqerta, me hapa besimtarësh dhe me paqe,” theksoi ai.
Në fund të mesazhit të tij, kryetari i Çairit uroi që Ramazani të sjellë shëndet, begati dhe qetësi në çdo familje, duke e cilësuar këtë muaj si një periudhë faljeje, drite dhe mirësie për të gjithë.
